Գազայի պատերազմը դադարեցնելու Թրամփի խաղաղության ծրագիրը լավագույն հնարավորությունն է․ Գերմանիայի կանցլեր
ԱՄՆ նախագահ Դոնալդ Թրամփի՝ Գազայի խաղաղության ծրագիրն Իսրայել-ՀԱՄԱՍ պատերազմը դադարեցնելու լավագույն հնարավորությունն է․ հայտարարել է Գերմանիայի կանցլեր Ֆրիդրիխ Մերցը, որի խոսքերը մեջբերել է Politico-ն։
Նրա խոսքով՝ Բեռլինը պատրաստ է օգնել հնարավոր խաղաղության համաձայնագրի իրականացմանը և Գազայի վերականգնմանը։
«Գրեթե երեք տարվա արյունահեղությունից հետո այս ծրագիրը պատերազմի դադարեցման լավագույն հնարավորությունն է, առնվազն մինչև այժմ լավագույն հնարավորությունը», – Բեռլինում լրագրողների հետ զրույցում նշել է Մերցը։ Ըստ կանցլերի՝ այն փաստը, որ Իսրայելն աջակցում է այս ծրագրին, նշանակալի քայլ առաջ է։
«Հիմա ՀԱՄԱՍ-ը պետք է համաձայնություն տա և մաքրի խաղաղության ճանապարհը: Սա իսկապես վերջին քայլն է, որն անհրաժեշտ է, և ես հստակորեն կոչ եմ անում ՀԱՄԱՍ-ին համաձայնել ծրագրին», – նշել է Մերցը։
Նրա մեկնաբանությունները հնչել են այն բանից հետո, երբ ԱՄՆ նախագահը և Իսրայելի վարչապետ Բենիամին Նեթանյահուն երկուշաբթի Սպիտակ տանը հայտարարեցին, որ նրանք նախնական համաձայնության են եկել Թրամփի վարչակազմի՝ Գազայի խաղաղության 20 կետանոց ծրագրի շուրջ։
Առաջարկը կոչ է անում ՀԱՄԱՍ-ին զինաթափվել, 72 ժամվա ընթացքում վերադարձնել բոլոր պատանդներին և հրաժարվել իշխանությունից։ Առաջարկի համաձայն՝ Իսրայելի ուժերը կհեռանան և ազատ կարձակեն բանտարկյալների և կալանավորների: ՀԱՄԱՍ-ը դեռևս չի համաձայնել այս ծրագրին։
Մերցի խոսքով՝ Գերմանիան պատրաստ է օգնել խաղաղության ծրագրի իրականացմանը և Գազայի վերականգնմանը, եթե խաղաղության համաձայնագիր կնքվի։
«Մենք սա դիտարկում ենք որպես Մերձավոր Արևելքի ուղղությամբ աշխատանք, որտեղ իսրայելցիներն ու պաղեստինցիները մի օր կարող են խաղաղ և անվտանգ ապրել երկու պետություններում», – հավելել է նա։
