Ալիևը մտադիր չէ մասնակցել Երևանում կայանալիք ԵՔՀ գագաթնաժողովին
Ադրբեջանի նախագահ Իլհամ Ալիևը մտադիր չէ մասնակցել 2026 թվականի մայիսին Հայաստանում կայանալիք Եվրոպական քաղաքական հանրության (ԵՔՀ) գագաթնաժողովին։ Այս մասին հաղորդել են պետականամետ ադրբեջանական ԶԼՄ-ները՝ հղում անելով աղբյուրներին։
«Երկկողմ հարաբերությունների ներկայիս մակարդակը դեռևս թույլ չի տալիս նախագահ Ալիևի այցը Երևան համարել կենսունակ քայլ։ Ադրբեջանը գործում է իրական գործողությունների սկզբունքով։ Բարձր մակարդակի այցն առանց ստորագրված պայմանագրի և առանց գործնական մեխանիզմների գործարկման կարող է ստեղծել գործընթացի ավարտի կեղծ տպավորություն։ Քանի դեռ իրավական բազան ձևակերպված չէ, և պարտավորությունները չեն սկսել իրականացվել, նման քայլերը կլինեն վաղաժամ»,- գրել է աղբյուրը։
Այնուամենայնիվ, ապագայում բարձր մակարդակի այցելությունների հնարավորությունը չի բացառվում։
«Ընդհակառակը, խաղաղության պայմանագրի ստորագրումից և իրականացումից հետո սա կլինի գործընթացի տրամաբանական շարունակությունը։ Այժմ անհրաժեշտ են գործնական քայլեր՝ նախկինում համաձայնեցված պարտավորությունները կատարելու համար, որոնք կամրապնդեն խաղաղությունը ոչ միայն դե ֆակտո, այլև՝ դե յուրե»,- նշվում է հոդվածում։
Հիշեցնենք, որ հոկտեմբերի 27-ին ՀՀ արտաքին գործերի նախարար Արարատ Միրզոյանը հայտարարել էր, որ ՀՀ իշխանությունները հրավիրել են Թուրքիայի և Ադրբեջանի նախագահներին մասնակցելու Եվրոպական քաղաքական համայնքի գագաթնաժողովին, որը նախատեսված է 2026 թվականի մայիսին Երևանում։ Միրզոյանը պարզաբանել էր, որ «հրավերը կատարվել է բանավոր, այժմ ընթացքի մեջ է հրավերի փաստաթղթավորումը»։
