Հայաստանում նոր ատոմակայանի կառուցման վերաբերյալ ռուսական առաջարկներին կենսունակ այլընտրանքներ չկան․ Գալուզին
Հայաստանում նոր ատոմակայանի կառուցման վերաբերյալ ռուսական առաջարկներին կենսունակ այլընտրանքներ չկան. հայտարարել է Ռուսաստանի փոխարտգործնախարար Միխայիլ Գալուզինը Известия-ի հետ զրույցում։
«Մենք հայկական կողմին ներկայացրել ենք մանրամասն առաջարկների փաթեթ։ «Ռոսատոմը» պատրաստ է հնարավորինս շուտ սկսել նախագծի իրականացումը՝ բնականաբար հաշվի առնելով մեր հայ ընկերների ցանկությունները։ Հուսալի, ապացուցված տեխնոլոգիաների առկայության, ինչպես նաև գրավիչ ֆինանսական պարամետրերի, այդ թվում՝ շինարարության, հետագա շահագործման և մասնագետների վերապատրաստման անհրաժեշտության առումով, կենսունակ այլընտրանքներ չկան», – ընդգծել է դիվանագետը։
Գալուզինի խոսքով՝ Մոսկվան մտադիր է շարունակել հանդես գալ որպես Հայաստանի էներգետիկ անվտանգության երաշխավոր։
«Մեր կողմից մենք մտադիր ենք շարունակել պատասխանատու կերպով կատարել մեր դերը՝ որպես Հայաստանի էներգետիկ անվտանգության երաշխավոր և նպաստել Հանրապետության միջուկային արդյունաբերության զարգացմանը։ Ինչպես ցույց է տալիս որոշ եվրոպական երկրների, այդ թվում՝ այնպիսի հսկաների փորձը, ինչպիսին է Գերմանիան, միջուկային էներգիայից հրաժարվելը կարող է թանկ նստել ազգային տնտեսության վրա»,- հավելել է նա։
Գալուզինը նշել է, որ Ռուսաստանն ու Հայաստանը մեծ փորձ ունեն միջուկային էներգիայի խաղաղ օգտագործման ոլորտում համագործակցության հարցում։
«Մեր միջուկային գիտնականները նույն, խորհրդային, «դպրոցից» են և լավ են հասկանում միմյանց։ Մեր մասնագետները ներկայումս իրականացնում են համալիր ծրագիր՝ ապահովելու համար, որ կայանը կարողանա հուսալիորեն և արդյունավետորեն գործել մինչև 2036 թվականը։ Մենք վստահ ենք, որ Երևանի ակտիվ աջակցությամբ բոլոր աշխատանքները կավարտվեն ժամանակին»,- նշել է Ռուսաստանի փոխարտգործնախարարը։
