Կան հստակ տեսագրություններ, թե ինչպես են ոստիկանները բռնություն գործադրում Աբրահամ Գասպարյանի նկատմամբ․ Հովհաննես Խուդոյան

Կան մարդիկ, որոնք ավելի լուրջ մարմնական վնասվածնքներ են ստացել հունիսի 12-ի դեպքերի ժամանակ, որոնց իրավունքների պաշտպանության համար որևէ արդյունավետ միջոց չի իրականացվել․ այսօր հրավիրած ասուլիսում ասաց փաստաբան Հովհաննես Խուդոյանը՝ անդրադառնալով 2024 թվականի հունիսի 12-ին Երևանում՝ Ազգային ժողովի մոտ տեղի ունեցած բախումներին։

«Ընդ որում՝ այդ ամենը կատարվել է տեսախցիկների առջև, կան հստակ տեսագրություններ, թե ինչպես են ոստիկանները բռնություն գործադրում Աբրահամ Գասպարյանի նկատմամբ»,- ասաց Հովհաննես Խուդոյանը։

Նրա խոսքով՝ ՄԱԿ-ի փորձագետները սուր հարցադրումներ են ներկայացրել Կառավարությանը հունիսի 12-ի ոստիկանական բռնության, ահաբեկության մասին հոդվածը խեղաթյուրելու և անձանց քաղաքական հայացքների համար հետապնդելու վերաբերյալ։ Փորձագետները հարցրել են, թե ինչ միջոցներ է ձեռնարկում պետությունն այս ամենի պատճառով տուժած անձնանց իրավունքները պաշտպանելու համար։

«Կառավարությունը խուսափողական պատախաններ է տվել»,- ասաց Հովհաննես Խուդոյանը։

Փաստաբան Տաթևիկ Սողոյանն էլ ասաց, որ իրենք փաստահավաք գործունեություն են սկսում հունիսի 12-ի վայրագություններից տուժած անձանց և նրանց պատմությունների վերաբերյալ։

Հիշեցնենք, որ «Տավուշը հանուն հայրենիքի» շարժման բողոքի ակցիայի ժամանակ ոստիկանությունը Բաղրամյան-Դեմիրճյան խաչմերուկում կիրառեց լուսաձայնային նռնակներ և այլ հատուկ միջոցներ: Դրա հետևանքով տարբեր վնասվածքներ ստացավ շուրջ 100 քաղաքացի և լրագրող, իսկ հետագայում քրեական հետապնդումներ սկսվեցին տասնյակ ցուցարարների նկատմամբ: