Ռուսաստանը հայ խորհրդարանականներին կոչ է անում կիսվել Բուչայում ենթադրաբար սպանվածների ցուցակով, որը նրանց է փոխանցել Կիևը։ Այս մասին Սանկտ Պետերբուրգի միջազգային տնտեսական համաժողովի շրջանակում լրագրողներին ասել է ՌԴ ԱԳՆ պաշտոնական ներկայացուցիչ Մարիա Զախարովան։
«Իհարկե, հայկական պատվիրակությունն ունի իբր զոհերի ցուցակ, որոնց սպանությունը Կիևի ռեժիմը վերագրել է ռուսական բանակին: Մենք իսկապես հուսով ենք, որ հայկական կողմը ցուցակը կփոխանցի ռուսական կողմին: Երկու տարի մենք չենք կարողանում կազմակերպություններին, այդ թվում՝ ՄԱԿ–ին, այս տվյալները տրամադրել»,- նշել է Զախարովան:
Հիշեցնենք, որ հունիսի 2-ին Բուչա են այցելել Ուկրաինայում Հայաստանի դեսպան Վլադիմիր Կարապետյանը և Երևանի Նոր Նորք վարչական շրջանի ղեկավար Տիգրան Տեր–Մարգարյանը։ Հայկական պատվիրակությունը մարդասիրական օգնություն և դեղորայք է նվիրաբերել քաղաքի բուժհաստատություններին։ Ավելի վաղ ՌԴ նախագահի մամուլի քարտուղար Դմիտրի Պեսկովը հայտնել էր, որ Կրեմլը պնդում է, որ Բուչայում տեղի ունեցած իրադարձությունների ուկրաինական տարբերակը բեմադրություն է։
