Հարավային Կովկասում խաղաղության իրական խոչընդոտն Ադրբեջանի նախագահ Իլհամ Ալիևի ագրեսիվ և էքսպանսիոնիստական քաղաքականությունն է, նշվել է The Jerusalem Post- ի՝ «Նամակներ խմբագրությանը» բաժնում:
Ըստ վերջինիս՝ Լեռնային Ղարաբաղի հակամարտության ավարտից հետո Ալիևը շարունակաբար խարխլում է խաղաղության ջանքերն՝ օգտագործելով բոլոր հնարավորություններն՝ ավելի շատ հայկական տարածքներ գրավելու համար։ Նրա վարչակարգը զորքեր է տեղակայել հենց Հայաստանում, Հայաստանի որոշ հատվածներ համարում է «Արևմտյան Ադրբեջան» և բացահայտ էթնիկ զտումներ է իրականացնում: «Հակաահաբեկչության» անվան տակ նա Արցախում իրենց տներից տեղահան է արել ավելի քան 120,000 հայերի:
Ալիևի հռետորաբանությունն ու գործողությունները հստակ ցույց են տալիս, որ նա խաղաղություն չի ցանկանում: Նրա վարչակարգը ծաղկում է անկայունության և ատելության շնորհիվ՝ ամրապնդելով իշխանությունը հակահայկական քարոզչության և ռազմական ագրեսիայի միջոցով: Միայն Ադրբեջանին իր գործողությունների համար պատասխանատվության ենթարկելով՝ մենք կարող ենք տարածաշրջանում կայուն խաղաղության հույս ունենալ:
