Երևանի Հակոբ Օշականի անվան թիվ 172 դպրոցում դասերն անցկացնում են հեռավար ձևաչափով։ Պատճառը շենքի տատանումներն են:
Համացանցում օգտատերերը տեղեկացրել են, որ դպրոցի տնօրենը զգացել է շենքի տատանումները և դիմել է համապատասխան մարմիններին: Դեպքի վայր ժամանած ծառայությունները տարհանել են անձնակազմն ու երեխաներին, որոնք ստիպված են եղել ժամերով դրսում սպասել: Օրվա վերջում հայտնել են, որ դասերը մեկ շաբաթ օնլայն կանցկացվեն:
ABC media-ին Երևանի քաղաքապետարանի լրատվության վարչությունից հայտնել են, որ տեղյակ են խնդրի մասին:
«Դպրոցը դեռ 90-ական թվականներից ունի վթարային կարգավիճակ, մասնավորապես՝ վթարային 3-րդ աստիճան: Վերջերս տնօրենը զգացել է որոշակի ցնցումներ և դիմել է փրկարար ծառայությանը: Նրանք ժամանել են և սկսել ուսումնասիրության աշխատանքները, որոնց ընթացքում նպատակահարմար է համարվել, որ այս պահին դասերը օնլայն ձևաչափով անցկացվեն: Փրկարար ծառայությունն իր աշխատանքն ավարտել է, եզրակացությունը փոխանցել է քաղաքապետարան, այժմ քաղաքապետարանի երկրաբանական մասնագիտական խումբն է աշխատում տեղում՝ խնդիրները պարզելու համար»,- հայտնել են քաղաքապետարանից:
Երեխաները հեռավար ուսուցումը շարունակվելու է մինչև ուսումնասիրությունների ավարտը: Սոցիալական ցանցերում օգտատերերը ահազանգում էին, որ դպրոցի տատանումների պատճառը հարևանությամբ կառուցվող շենքն է: Քաղաքապետարանից հաստատում են, որ դպրոցի հարևանությամբ շինարարություն է իրականացվում: բայց մինչ փրկարար ծառայության ուսումնասիրությունների ավարտը հստակ պարզ չէ՝ շինարարությո՞ւնն է տատանումների պատճառը, թե՞ շենքի հնությունը։
