Այս տարվա «COP29»՝ կլիմայի փոփոխության վերաբերյալ աշխարհի գլխավոր համաժողովը տեղի կունեա Ադրբեջանում, գրել է Հետաքննող լրագրողների ընկերակցությունը (OCCRP):
Հանդիպումների 11 օրվա ընթացքում հազարավոր քաղաքական և բիզնես առաջնորդներ կվայելեն աշխարհի ամենաճնշող և կոռումպացված ռեժիմներից մեկի հյուրընկալությունը: Նրանց ներկայությունը կիրականացնի Ադրբեջանի կառավարության ամենամեծ նպատակներից մեկը՝ բարձրացնել իր վստահությունն ու դիրքը համաշխարհային բեմում:
Տարիներ շարունակ OCCRP-ն աշխատել է տեղի լրագրողների հետ՝ բացահայտելու, թե ինչպես է երկրի փոքր վերնախավը, կենտրոնացած իշխող Ալիևների ընտանիքի շուրջ, հարստացել՝ թալանելով երկրի հարստությունը, հաճախ՝ իր ժողովրդի հաշվին:
«Եվ տարիներ շարունակ մենք ստիպված ենք եղել հայտնել, թե ինչպես են այդ նույն լրագրողները դարձել քաղբանտարկյալներ՝ բանտարկված ճշմարտությունն ասելու հանցանքի համար։ Ալիևի ռեժիմի բազմակի բռնաճնշումները ուղղված են եղել նաև ակտիվիստների, ակադեմիկոսների և ցանկացած այլ այլախոհների դեմ, ովքեր համարձակվել են վիճարկել կառավարության գիծը»:
The New York Times-ը գրել է, որ համաժողովը տեղի կունենա այն ժամանակ, երբ 62-ամյա Ալիևը ամրապնդում է իր գերիշխանությունը մոտ 10 միլիոնանոց երկրում: Հրաժարվելով և՛ Ռուսաստանի, և՛ Արևմուտքի տասնամյակների միջնորդական ջանքերից՝ Ալիևն օգտագործել է իր արդիականացված բանակը 2020-ին 44-օրյա պատերազմում հայկական ուժերի դեմ պայքարում և անցած տարի կայծակնային գործողության ժամանակ: Նա գրավել է Լեռնային Ղարաբաղը, որը բնակեցված է եղել տասնյակ հազարավոր հայերով, ովքեր ստիպված են եղել փախչել։
Հայաստանն ու Ադրբեջանը այժմ բանակցում են խաղաղության համաձայնագրի և Հայաստանի տարածքով դեպի Թուրքիա հնարավոր տրանսպորտային կապերի շուրջ: Բանակցությունները կարող են վերագծել Սև և Կասպից ծովերի միջև քարտեզն այնպես, որ, կախված արդյունքից, դրանք կարող են նվազեցնել Ռուսաստանի և Իրանի ազդեցությունը տարածաշրջանում՝ միաժամանակ մեծացնելով ՆԱՏՕ-ի դաշնակից Թուրքիայի ազդեցությունը:
Արևմուտքի աշխարհաքաղաքական հակամարտություններում իր առանցքային դերի արդյունքում՝ Ալիևը չի ակնկալում, որ Ադրբեջանում մարդու իրավունքների ոտնահարման վերաբերյալ արևմտյան քննադատությունը իրական հետևանքների կհանգեցնի:
Transparency International-ի և Anti-Corruption Data Collective-ի հրապարակած զեկույցի համաձայն՝ Ադրբեջանի հանածո վառելիքից ստացած շահույթը, կոռուպցիայի արմատացած մակարդակը և ավտոկրատական կառավարությունը վտանգի տակ են դնում ՄԱԿ-ի գլխավորած կլիմայական գործընթացը:
