Տարածաշրջանային լարվածության աճի պայմաններում՝ Իրանն ու Ադրբեջանը համատեղ զորավարժություններ են անցկացնում․ Barron’s
Ամերիկյան հեղինակավոր Barron’s թերթն անդրադարձել է այս շաբաթ մեկնարկած Իրանի ու Ադրբեջանի համատեղ երկօրյա ռազմածովային զորավարժություններին Կասպից ծովում։ Նշվել է, որ երկրների պետական ԶԼՄ-ներն ազդարարել են հարևանների միջև հարաբերությունների բարելավման մասին՝ տարածաշրջանային լարվածության աճի պայմաններում:
Միևնույն ժամանակ, հիշվեցվել է, որ երկու երկրների միջև հարաբերությունները սրվել են 2023 թվականի հունվարին, երբ զինված անձը ներխուժել է Թեհրանում Բաքվի դեսպանատուն՝ սպանելով դիվանագետին և վիրավորելով անվտանգության երկու աշխատակցի։ Իրանի ԱԳՆ-ն այն ժամանակ խստորեն դատապարտել է հարձակումը՝ նշելով, որ դրա հիմքում ընկած շարժառիթները «անձնական» են:
Սակայն Ադրբեջանը քննադատել է Իրանին՝ պնդելով, թե հարձակումը խրախուսվել է հակաադրբեջանական արշավի կողմից: 2023 թվականի ապրիլին Ադրբեջանը Իրանի դեսպանատան չորս աշխատակիցների «անցանկալի անձ» է հայտարարել։ Իր հերթին, մեկ ամիս անց Իրանն արտաքսել է չորս ադրբեջանցի դիվանագետների։ Սակայն հուլիսին Թեհրանում Ադրբեջանի դեսպանատունը վերսկսեց իր բնականոն աշխատանքը:
Երկու երկրների միջև կապերը ավանդաբար սրվել են, քանի որ նախկին խորհրդային հանրապետությունը Իրանի պատմական հակառակորդ և ոխերիմ թշնամի Իսրայելի մերձավոր դաշնակիցն է:
Իրանը նաև մտավախություն ունի, որ Ադրբեջանի տարածքը կարող է օգտագործվել Բաքվին զենք մատակարարող Իսրայելի կողմից Իրանի վրա հնարավոր հարձակման համար: Իրանը և Իսրայելը վերջին ամիսներին ուղղակի հարձակումներ են իրականացրել միմյանց դեմ, որոնցից վերջինը հոկտեմբերի 26-ին իսրայելական ռազմական ինքնաթիռների կողմից իրանական ռազմական օբյեկտների դեմ էր, ինչը հանգեցրել է հինգ իրանցիների մահվան:
