Աստվածային պարգևն ու պատիժը․ նոր միտում՝ ադրբեջանցի բարձրաստիճան պաշտոնյաների հռետորաբանությունում

Ադրբեջանի նախագահի արտաքին քաղաքականության հարցերով խորհրդական Հիքմեթ Հաջիևը գրառում է կատարել X հարթակի իր օգտահաշվում, որտեղ նա պատասխանել է ամերիկացի սենատոր Էդ Մարկի ելույթներին COP29-ում և Բաքվից վերադառնալուց հետո։ Հաջիևի խոսքով՝ «անջատողական առաջնորդների, այդ թվում՝ օլիգարխ Ռուբեն Վարդանյանի հանցագործությունների հետաքննությունը կհասցվի իրենց տրամաբանական ավարտին, և նրանք կներկայանան դատարան»։

Նա նաև ընդգծել է, որ  արցախցիները քաղաքացիություն ստանալու համար կարող են դիմել «միայն անհատական հիմունքներով», և նրանց վերադարձը կքննարկվի Ադրբեջանի օրենսդրությանը համապատասխան։ «Սակայն դա կարող է տեղի ունենալ միայն փոխադարձ հիմունքներով և Հայաստանից վտարված ադրբեջանական բնիկ բնակչության վերադարձի իրավունքի ճանաչմանը զուգահեռ», – նշել է խորհրդականը:

Հաջիևն այնուհետև կոչ է արել ամերիկացի օրենսդիրներին չլինել «հայկական լոբբիի գործիքները», ինչը խոչընդոտում է Հայաստանի հետ խաղաղությանը։

Անդրադառնալով կոնգրեսական Ֆրենկ Փալլոնի Բաքու ժամանմանը՝ Հիքմեթ Հաջիևը Ադրբեջանից նրա հապճեպ փախուստն անվանել է «աստվածային հատուցում ադրբեջանական ժողովրդի հանդեպ այն անարդարության համար, որին նա երկար տարիներ սատարում էր»։

Հիշեցնենք, որ ավելի վաղ Ադրբեջանի նախագահ Իլհամ Ալիևը, ելույթ ունենալով ՄԱԿ-ի կլիմայական գագաթնաժողովի ժամանակ, նավթն ու գազն անվանել էր «Աստծո պարգև», ինչը միջազգային մամուլում մեծ արձագանք և դժգոհություն էր առաջացրել։ COP-ի նպատակն է պայքարել կլիմայական փոփոխությոնների դեմ՝ նվազեցնելով հանածո վառելիքի արտահանումը։