Վաշինգտոնը ցանկանում է, որ պատերազմն Ուկրաինայում ավարտվի, բայց դա ԱՄՆ պատերազմը չէ․ Մարկո Ռուբիո
ԱՄՆ պետքարտուղար Մարկո Ռուբիոն հայտարարել է, որ եթե հնարավոր չլինի վերջ տալ Ուկրաինայում պատերազմին, ապա ԱՄՆ-ն պետք է հրաժարվի իր ջանքերից և առաջ շարժվի․ հայտնել է CNN-ը։
«Հիմա մենք պետք է շատ արագ որոշենք, և ես խոսում եմ օրերի մասին՝ դա հնարավո՞ր է, թե՞ ոչ», – հայտարարել է Ռուբիոն: Մեկնաբանությունները հնչել են մեկ օր անց այն բանից հետո, երբ նա և հատուկ բանագնաց Սթիվ Վիտկովը հանդիպել են եվրոպացի և ուկրաինացի դաշնակիցներին, և ԱՄՆ նախագահ Դոնալդ Թրամփի վարչակազմը հորդորում է դադարեցնել Ռուսաստանի պատերազմն Ուկրաինայում:
Պետքարտուղարության հաղորդագրության համաձայն՝ ԱՄՆ-ի հեղինակած խաղաղության ծրագրի ուրվագծերը «խրախուսելի ընդունելության» են արժանացել բանակցություններում։ Ռուբիոն զրուցել է նաև Ռուսաստանի արտգործնախարար Սերգեյ Լավրովի հետ։ Պետքարտուղարը նաև ընդգծել է, որ ինքը և Վիտկոֆը եկել են Փարիզ՝ «խոսելու ավելի կոնկրետ ուրվագծերի մասին․ թե ի՞նչ կարող է պահանջվել պատերազմի ավարտի համար», և արդյո՞ք սա պատերազմ է, որին կարելի է վերջ տալ, թե՞ ոչ»:
«Դա մեր պատերազմը չէ: Մենք չենք սկսել այն: Միացյալ Նահանգներն օգնում է Ուկրաինային վերջին երեք տարիների ընթացքում, և մենք ցանկանում ենք, որ այն ավարտվի, բայց դա մեր պատերազմը չէ», – հավելել է նա՝ ընդգծելով, որ Թրամփը բազմիցս ջանքեր է գործադրել այս պատերազմն ավարտին հասցնելու համար:
