Արցախը միշտ եղել է միջազգային շահերի կենտրոնում. Վահրամ Բալայան
Արցախը միշտ եղել է միջազգային շահերի կենտրոնում, ինչը պայմանավորված է ոչ միայն նրա ռազմավարական նշանակությամբ, այլև պատմականորեն նշանակալի դիրքով. «Փոփոխվող աշխարհը և Հայաստանը» խորագրով քննարկման ժամանակ ասել է Արցախի ԱԺ նախկին փոխնախագահ, Արտաքին հարաբերությունների մշտական հանձնաժողովի նախագահ Վահրամ Բալայանը։
«Արցախը միշտ կարևոր դեր է խաղացել հայ ժողովրդի կյանքում, իսկ վերջին տարիներին դարձել է ոչ միայն Հայաստանի, այլ նաև միջազգային ուժերի համար հետաքրքիր տարածք»,-ասել է նա։
Նրա խոսքով` Արցախը և նրա ժողովուրդը մշտապես կանգնած են եղել տարբեր գերտերությունների հետաքրքրությունների կենտրոնում՝ սկսած 13-րդ դարից մինչև այսօր, երբ համաշխարհային գերտերությունները, ներառյալ Պարսկաստանը, Ռուսաստանը և Իրանը, շարունակաբար հետևում են տարածաշրջանում տեղի ունեցող փոփոխություններին։ Բալայանը մանրամասն անդրադարձել է 18-րդ դարի և հետագա շրջաններին, երբ հայկական իշխանությունները մեծ դեր էին խաղում թուրքերի դեմ պայքարում։
«Արցախը Հայաստանի անվտանգության կարևոր բաղկացուցիչն է, և նրա կայունությունը ապահովում է ոչ միայն Հայաստանի, այլ նաև ամբողջ տարածաշրջանի կայունությունը»,- նշել է նա։ Բալայանը ընդգծել է, որ Արցախի և Հայաստանի կապը ոչ միայն պատմականորեն, այլ նաև ռազմավարական առումով կարևոր է. «Արցախը այն բուֆերային տարածքն է, որը պաշտպանում է Հայաստանի անվտանգությունը, այդ թվում՝ Սյունիքը»:
Անդրադառնալով Ադրբեջանի հռետորաբանության փոփոխությանը` Վահրամ Բալայանը նշել է, որ այսօր, երբ նախկինում պահանջվող «մի քանի շրջանների» փոխարեն այժմ խոսում են ամբողջ Լեռնային Ղարաբաղի մասին, կարևոր է հիշել, որ այդ հարցերը չեն փակվել, և Արցախի ու Հայաստանի շահերը պետք է մշտապես մնան միջազգային ուշադրության կենտրոնում։
«Եթե մենք շարունակում ենք աշխատել միասնական ուժերով, մենք կկարողանանք լուծել թե՛ ազգային, թե՛ Արցախի հիմնահարցերը»,- եզրափակել է Վահրամ Բալայանը։
