ԱՄՆ-ում քննարկվում է հեռուստաշոուի գաղափար, որտեղ ներգաղթյալները կմրցեն քաղաքացիություն շահելու համար

ԱՄՆ Ներքին անվտանգության նախարարությունը քննարկում է անսովոր հեռուստաշոուի գաղափար, որի շրջանակում ներգաղթյալները կմրցեն ԱՄՆ քաղաքացիություն շահելու համար. հայտնում է The Guardian-ը՝ հղում անելով New York Times-ին։

Նախատեսվում է, որ շոուն կներառի ամերիկյան ավանդույթների հիման վրա կազմված փորձություններ։

Նախարարության խոսնակ Թրիշա Մակլաֆլինը նշել է, որ դա «ամերիկացի լինելու տոնակատարություն» է, և հավելել, որ նախաձեռնությունն այժմ քննարկման փուլում է. որևէ հաստատում կամ մերժում դեռ չկա։

Նման նախագիծ ի հայտ է եկել այն ժամանակ, երբ Դոնալդ Թրամփի վարչակազմը իրականացնում է խիստ ներգաղթի քաղաքականություն՝ ներառելով նույնիսկ օրինական բնակության իրավունք ունեցող անձանց, փախստականներին ու ժամանակավոր կարգավիճակով բնակվողներին։

Որոշ դեպքերում, ըստ հաղորդումների, ԱՄՆ քաղաքացիություն ունեցող երեխաներ արտաքսվել են ծնողների հետ։

Ներքին անվտանգության ներկայիս ղեկավար Քրիստի Նոեմը, ով նախկինում Հարավային Դակոտայի նահանգապետն էր, խիստ քննադատության է արժանանում ներգաղթի ոլորտում իր «հեռուստաշոուային» մոտեցման համար։ Նա պաշտոնը ստանձնելուց անմիջապես հետո լուսանկարվել է հատուկ հանդերձանքով՝ ներգաղթի ծառայությունների աշխատակիցների կողքին, և այցելել է Էլ Սալվադոր՝ լուսանկարվելով հայտնի բանտում, որտեղ պահվում են ԱՄՆ-ից արտաքսված հարյուրավոր անձինք։

Հեռուստաշոուի գաղափարը ներկայացրել է կանադացի պրոդյուսեր Ռոբ Ուորսոֆը, ով նախկինում աշխատել է «Duck Dynasty» ռեալիթի շոուի վրա՝ հայտնի Թրամփի աջակից շրջանակներում։