Բաքվում շարունակվել է Ռուբեն Վարդանյանի շինծու գործով դատավարությունը
Բաքվում այսօր կայացել է Արցախի նախկին պետնախարար, բարերար Ռուբեն Վարդանյանի գործով հերթական շինծու դատական նիստը։
Ադրբեջանական լրատվամիջոցները հայտնում են, որ այսօրվա նիստի ընթացքում փաստաբան Աբրահամ Բերմանը նշել է, որ հունիսի 23-ին դատական կոլեգիան իր և պաշտպանյալի համար պայմաններ է ստեղծել արձանագրությանը ծանոթանալու համար, և իրենք ծանոթացել են փետրվարի 13-ին և 17-ին անցկացված դատական նիստերի արձանագրություններին: Այժմ նրանք ցանկանում են ծանոթանալ դատարանի նախապատրաստական նիստում ընդունված և արձանագրությունում արտացոլված որոշմանը: Պաշտպանական կողմը նաև խնդրել է տրամադրել քաղվածքներ այդ ամսաթվերի նիստերին ներկայացված միջնորդությունները բավարարելու վերաբերյալ որոշումներից:
Նախագահող դատավորը նշել է, որ Բերմանի և Վարդանյանի համար կստեղծվեն նույն պայմանները, ինչ և նախկինում:
Այնուհետև ցուցմունքներ են տվել 2020 թվականի պատերազմի ժամանակ այսպես կոչված «տուժածները»։
Հաջորդ նիստը նշանակված է հուլիսի 8-ին:
