ՌԴ-ի համար ՀՀ-ով արտատարածքայնության ռեժիմը չէր կարող դիտարկվել նույնիսկ տեսականորեն․ Զախարովա
ՌԴ ԱԳՆ ներկայացուցիչ Մարիա Զախարովան ճեպազրույցի ժամանակ հայտարարել է, որ օգտոստոսի 20-ին Ռուսաստանի փոխվարչապետ Ալեքսեյ Օվերչուկի այցը ՀՀ անցել է պրոֆեսիոնալ, բաց և կառուցողական մթնոլորտում։ Նրա խոսքով՝ քննարկվել են տնտեսական համագործակցության բազմատիվ ասպեկտներ՝ ինչպես երկկողմ, այնպես էլ բազմակողմ ձևաչափերում, ինչպիսին է ԵԱՏՄ–ն։ Զախարովան հայտնել է, որ հաջողվել է գալ համաձայնության որոշակի նյուանսների շուրջ՝ ԵՄ–ի և ԵԱՏՄ–ի տեխնիկական անհամատեղելության համատեքստում։ Պայմանավորվածություն է ձեռք բերվել հետագա քայլերի վերաբերյալ։
Նա նաև անդրադարձել է օգոստոսի 8-ի վաշինգտոնյան գագաթնաժողովին՝ նշելով, որ ՀՀ ղեկավարությունը ներկայացրել է ռուսական կողմի ձեռք բերված պայմանավորվածությունները։
«ՌԴ–ի համար կարևոր է, որ խաղաղությանն ուղղված գործընթացները կայուն և երկարատև բնույթ ունենան, հաշվի առնվեն Հարավային Կովկասի բոլոր երկրների և հարևանների շահերը։ Ոչ տարածաշրջանային խաղացողների ներգրավումը չպետք է տաքացնի տարածաշրջանի կոնֆլիկտային պոտենցյալը և սեղծի այնտեղ նոր բաժանարար գծեր։ Նման մոտեցումն ամբողջովին վերաբերում է նաև տրանսպորտային հաղորդակցությունների ապաշրջափակմանը, որը պետք է հաշվի առնի բոլոր ներգրավված կողմերի շահերը», – նշել է Զախարովան՝ հավելով, որ ՀՀ–ի, Ադրբեջանի, ՌԴ–ի մասնակցությամբ 2020 թ–ի եռակողմ համաձայնագրերը պահպանում են իրենց ակտուալությունը։ Նա նշել է, որ կողմերից ոչ մեկ պաշտոնապես չի հրաժարվել այդ համաձայնագրերից, իսկ եռակողմ աշխատանքային խումբը հսկայական աշխատանք է արել։ «Ավելին դեռ ոչ ոքի չի հաջողվել անել», – հավելել է Զախարովան։
Նա, մեկնաբանելով Նիկոլ Փաշինյանի հայտարարությունը, թե ՌԴ–ի հետ եռակողմ համաձայնագրերն անցյալում են, նշել է, որ լեզվական, ոճական, լեզվաբանական վարժությունները հարցի մի կողմն են, մյուս կողմը՝ փաստաթղթերն են, որոնք կան։ «Հիմա բոլորը հղում են անում 90-ականների փաստաթղթին։ Դրանք էլ են փաստաթղթեր անցյալից, բայց բոլորը հղում են անում դրանց։ Այնպես, որ մենք պետք է մեկնաբանենք փաստերը։ Իսկ փաստեր այդ գործող փաստաթղթերն են։ Ես չեմ լսել, որ որևէ մեկը ժխտի կամ դուրս գա դրանցից», – նշել է Զախարովան։
Նա նաև ընդգծել է, որ «Թրամփի երթուղու» մանրամասները դեռևս հայտնի չեն։ Զախարովան հավելել է, որ ՌԴ–ի համար ՀՀ–ով արտատարածքայնության ռեժիմը չէր կարող դիտարկվել նույնիսկ տեսականորեն։
