Թրամփը Գազայում խաղաղության նոր ծրագիր է ներկայացրել. Financial Times
Նյու Յորքում ՄԱԿ-ի Գլխավոր ասամբլեայի շրջանակներում արաբ և մահմեդական առաջնորդների հետ հանդիպման ժամանակ ԱՄՆ նախագահ Դոնալդ Թրամփը ներկայացրել է Գազայի հատվածում հակամարտության կարգավորման նոր ծրագիր. գրում է Financial Times թերթը՝ հղում անելով իր աղբյուրներին:
FT-ի տվյալներով՝ ծրագրի անվտանգային հիմնական բաղադրիչը արաբական և մահմեդական ուժերից կազմած ռազմական կոնտինգենտ Գազա ուղարկելու գաղափարն է՝ հակամարտության ավարտից հետո անկլավում իրադրությունը կայունացնելու համար:
Ավելին՝ ամերիկյան առաջարկը ներառում է կետ, որը կոչ է անում անհապաղ ազատ արձակել պաղեստինյան արմատական շարժման կողմից պահվող բոլոր պատանդներին:
Ծրագրով նախատեսվում է, որ Իսրայելի պաշտպանության ուժերը վերադառնան այն դիրքերին, որոնք զբաղեցրել են հունվարից մարտին՝ ժամանակավոր հրադադարի ընթացքում. վերոնշյալ ռազմական կոնտինգենտի ձևավորումից հետո իսրայելական ուժերը լիովին դուրս կգան անկլավից:
Այս ծրագրի համաձայն՝ Գազայի բնակիչները չեն ենթարկվի բռնի տեղահանման, և ՀԱՄԱՍ-ը որևէ դեր չի խաղա տարածքի կառավարման գործում. դրա փոխարեն կստեղծվի միջազգային վերահսկողական մարմին՝ այսպես կոչված Պաղեստինյան կոմիտեն վերահսկելու համար. այս կառույցը, որը կներառի Պաղեստինի ազգային ինքնավարության ներկայացուցիչներին, ժամանակավորապես կկառավարի Գազան:
Նշվում է, որ սեպտեմբերի 23-ին Թրամփի հետ հանդիպմանը մասնակցել են Սաուդյան Արաբիայի, ԱՄԷ-ի, Եգիպտոսի, Հորդանանի, Կատարի, Թուրքիայի և Ինդոնեզիայի առաջնորդներն ու ներկայացուցիչները. արաբական և իսլամական պետությունների ղեկավարները դրական են արձագանքել ծրագրին, սակայն ընդգծել են Գազայի հետպատերազմյան կառավարման հետ կապված գործընթացներում Պաղեստինի ազգային բանակի ավելի մեծ ներգրավվածության անհրաժեշտությունը:
