Թուրքիայում, բացի Ստամբուլի քաղաքապետից, կարող են ազատ արձակվել բազմաթիվ ընդդիմադիրներ և լրագրողներ

Թուրքական մամուլում շրջանառվող տեղեկությունների համաձայն՝ Ստամբուլի նախկին քաղաքապետ Էքրեմ Իմամօղլուից բացի, գլխավոր ընդդիմադիր «Ժողովրդահանրապետական» կուսակցության (ԺՀԿ-CHP) բազմաթիվ անդամներ առաջիկայում կարող են ազատ արձակվել․ գրում է Ermenihaber-ը։

Ստամբուլի քաղաքապետարանի դեմ մարտի 19-ին իրականացված գործողությունից հետո մի շարք ԺՀԿ-ական քաղաքապետեր և ավագանու անդամներ կալանավորվել էին։ Սակայն մինչ օրս Իմամօղլուի վերաբերյալ մեղադրական եզրակացություն չի կազմվել։

Լրագրող Ջան Ջոշքունի փոխանցմամբ՝ խոսակցություններ կան, որ որոշ շրջանային ղեկավարներ և տասնյակ ավագանու անդամներ շուտով կարող են ազատ արձակվել։ Խոսքը վերաբերվում է ոչ միայն ԺՀԿ-ականների ազատ արձակմանը, այլև լրագրողներին և հանրային ուշադրության կենտրոնում գտնվող որոշ հայտնի անձանց: