ԱՄՆ-ից եկող «իմպերիալիստական սպառնալիքի» պատճառով Վենեսուելայում «զանգվածային մոբիլիզացիա» է հայտարարվել
Վենեսուելայում «զանգվածային մոբիլիզացիա» է հայտարարվել՝ ի պատասխան Կարիբյան ծովում ամերիկյան ռազմանավերի և զորքերի կուտակման․ գրում է CNN-ը։
Երկրի պաշտպանության նախարար Վլադիմիր Պադրինո Լոպեսը հայտարարել է, որ ցամաքային, օդային, ռազմածովային և պահեստազորային ուժերը զորավարժություններ կանցկացնեն։ Լոպեսն այս քայլը որակել է որպես ամերիկյան ուժերի կուտակման հետևանքով առաջացող «իմպերիալիստական սպառնալիքի» պատասխան։
Պադրինո Լոպեսը, որը հրամանն ուղղակիորեն վերագրել է Վենեսուելայի նախագահ Նիկոլաս Մադուրոյին, ասել է, որ զորավարժությունների նպատակն է ապահովել երկրի պաշտպանությունը։
Մոբիլիզացիան տեղի է ունենում երկու երկրների միջև լարվածության աճի ֆոնին։
Երեքշաբթի ԱՄՆ ռազմածովային ուժերը հայտարարեցին, որ ամերիկյան ամենամեծ ռազմանավը՝ USS Gerald R. Ford ավիակիրը, ժամանել է ԱՄՆ Հարավային հրամանատարության գործողությունների գոտի, որը ներառում է Լատինական Ամերիկայի մեծ մասը։
