ՀՀ քաղաքացիների գրպանում տասնյակ միլիարդավոր դրամներ են մնացել․ Փաշինյանի ելույթը՝ կետերով
Նիկոլ Փաշինյանը մասնակցել է «Հայաստանը և խաղաղությունը ռիսկերի ու հնարավորությունների խաչմերուկում» թեմայով քննարկման, որի ընթացքում անդրադարձել է ներքաղաքական և արտաքին քաղաքականությանն առնչվող տարբեր հարցերի։ Ելույթի կարևոր հատվածները ներկայացնում ենք ստորև․
- Դեկտեմբերի 25-ից մինչև այսօր ՀՀ քաղաքացիների գրպանում տասնյակ միլիարդավոր դրամներ են մնացել։ Բենզինի ներմուծման մենաշնորհը դե յուրե հաղթահարել ենք։
- Ասում են՝ «բենզինի համար Եռաբլուրը մոռացաք»։ Ո՛չ, այդպես չէ, որովհետև զարգացած, կայուն, անվտանգ, միջազգային բարձր հեղինակություն ունեցող ՀՀ-ն ամենամեծ հարգանքի տուրքն է մեր նահատակներին, մեր ընկած եղբայրներին։
- Արդյո՞ք մենք ուզում ենք լինել ԵՄ անդամ՝ այո՛, աներկբա և միանշանակ, բայց ԵՄ անդամ լինելու համար կա մի շատ մեծ և կարևոր նախապայման՝ երկիրն օբյեկտիվորեն պետք է համապատասխանի ԵՄ ստանդարտներին՝ գոնե 97–99 %-ով։
- Պարզվում է, որ այնուամենայնիվ տարածք կա՝ և՛ ԵՄ ճանապարհով գնալու, և՛ ԵԱՏՄ անդամ լինելու։ Մենք այդ տարածքի մեջ ենք, մենք հստակ ենք հայտարարում և ձև չենք անում։
- Ակնհայտ է, որ Հայաստան-Թուրքիա սահմանին կամուրջներ պետք է կառուցվեն։ Առնվազն Մարգարայում կամուրջ պետք է կառուցվի, Ախուրիկում ակնհայտ է, որ մաքսային և սահմանային տերմինալներ պետք է կառուցվեն, Երասխում մաքսային և սահմանային տերմինալներ պետք է կառուցվեն։
- Հայաստան-Թուրքիա սահմանին էլեկտրահաղորդման գծերի անցկացման հետ կապված որոշ քայլեր ուզում են անել։ Բանակցային այն սենյակում, որտեղ ես խոսում եմ նախագահ Էրդողանի հետ, այդ հարցերը լուծված են տեսանելի ապագայի համար։
