Ո՞ւմ էր ուղղված ռուսական հարվածն ուկրաինա-լեհական սահմանի մոտ․ «Ուկրաինական երկաթուղիներ»-ի հայտարարությունը
Ռուսական անօդաչու թռչող սարքն Ուկրաինա-Լեհաստան սահմանի մոտ հարվածել է գնացքի՝ Մեծ Բրիտանիայի նախկին վարչապետ Բորիս Ջոնսոնի և եվրոպական անվտանգության ոլորտի բարձրաստիճան պաշտոնյաների անցնելուց կարճ ժամանակ անց․ գրում է BBC-ն։
Յահոդինում (Ուկրաինայի Վոլինի մարզում գտնվող երկաթուղային կայարան և սահմանային անցակետ, որը տեղակայված է ուկրաինա-լեհական սահմանին) տեղի ունեցած հարվածի հետևանքով, որն ուղղված էր գնացքի լոկոմոտիվին, զոհեր կամ վիրավորներ չեն գրանցվել։
Ուկրաինայի իշխանությունների հաղորդմամբ՝ բոլոր ուղևորները տարհանվել են։ Ջոնսոնը և եվրոպական երկրների ազգային անվտանգության հարցերով խորհրդականները նույն գծով անցել էին մեկ այլ գնացքով՝ Կիևում կայացած համաժողովից վերադառնալիս։
Ռուսաստանը հայտարարել է, որ հարվածել է Արևմտյան Ուկրաինայի «երկաթուղային ենթակառուցվածքին», սակայն Ուկրաինայի պետական երկաթուղային ընկերությունը նշել է, որ «շատ հավանական է, որ այդ անօդաչուի թիրախը կարող էր լինել դիվանագիտական գնացքը»։
Հայտարարության մեջ նշվում է, որ դիվանագիտական գնացքը «կայարանից մեկնել էր սպասվածից շուտ՝ ժամանակացույցի փոփոխության պատճառով… ռուսական հարվածների մշտական սպառնալիքների հետևանքով»։
Ընկերությունը նաև հայտնել է, որ հարվածի ենթարկված գնացքի ուղևորներին տարհանելու հրահանգը տրվել էր ռուսական ռեակտիվ շարժիչով անօդաչուի հարվածից «ընդամենը 15 րոպե» առաջ:
