Թրամփն ու Զելենսկին կհանդիպեն․ Ուկրաինան պատրաստ է «լուրջ քայլեր ձեռնարկել»․ Axios

ԱՄՆ նախագահ Դոնալդ Թրամփի հետ հեռախոսազրույցից հետո Ուկրաինայի նախագահ Վլադիմիր Զելենսկին հայտարարել է, որ նրանք կհանդիպեն Նյու Յորքում՝ ՄԱԿ-ի Գլխավոր ասամբլեայի շրջանակում․ հայտնում է Axios-ը։

Զելենսկիի գլխավոր բանակցող և Ուկրաինայի արտաքին հետախուզության ծառայության ղեկավար Ռուստեմ Ումերովը Axios-ին հայտնել է, որ վերջին օրերին աշխատել է Սպիտակ տան ներկայացուցիչների հետ՝ կազմակերպելու հանդիպումը, որը նախատեսված է երեքշաբթի օրը։

Զելենսկին նշել է, որ Ուկրաինան պատրաստ է «իսկապես լուրջ քայլեր ձեռնարկել»՝ Ռուսաստանի հետ լարվածության թուլացման շուրջ համաձայնության հասնելու համար։

Հեռախոսազրույցին քաջատեղյակ աղբյուրը հայտնել է, որ Թրամփը բազմիցս խնդրել է Զելենսկիին դադարեցնել հարձակումները ռուսական նավթավերամշակման գործարանների վրա։ Այդ հարվածները հանգեցնում են դիզելային վառելիքի համաշխարհային գների բարձրացմանը։

«Զրույցի ընթացքում բազմիցս հիշատակվել է դիզելային վառելիքի մասին», – նշել է աղբյուրը։

Ումերովը հայտնել է, որ բանակցություններում զգալի առաջընթաց է գրանցվել։ «Մասնավորապես, խոչընդոտող հարցերի թիվը տասնյակներից կրճատվել է՝ հասնելով ըստ էության մեկ կամ երկու առանցքային խնդրի, որոնք դեռևս բանակցությունների առարկա են»,- նշել է նա։

«Միտումը դրական է։ ԱՄՆ-ն խիստ կենտրոնացած է Ուկրաինայում պատերազմը դադարեցնելու խնդրի վրա։ ԱՄՆ-ն հասկանում է մարտի դաշտում տիրող իրավիճակը և բոլորին ազդանշան հղում, որ այս սարսափելի պատերազմը պետք է ավարտվի»,- նշել է Ումերովը։