Կփորձենք համոզել ընդդիմությանը, որ Սահմանադրությունը պետք է փոխվի, եթե չստացվեց, չի բացառվում՝ գնանք արտահերթ ընտրության․ Փաշինյանի ճեպազրույցը՝ կետերով
COP17-ի նման միջոցառումներն այդ թվում նրա համար են, որ Հայաստանի ճանաչելիությունը բարձրանա, դա ինքնանպատակ չի, ճանաչելիությունը տնտեսական գործոն է․ այսօր ճեպազրույցի ժամանակ ասաց Նիկոլ Փաշինյանը։
Ներկայացնում ենք Փաշինյանի հայտարարությունները՝ կետերով․
- Մարդն անցել է, զինվորականները հայտնաբերել են, հանձնել են ԱԱԾ մարմիններին։ Տեսնում էին՝ մարդ ա գալիս, կրակեին, սպանեի՞ն։ Տեսնում էին՝ մարդ ա, քայլելով գալիս ա, ձերբակալել են, հանձնել են ԱԱԾ-ին։ Հանրապետության հրապարակից չեն ձերբակալել․ Փաշինյանը՝ ՀՀ սահմանը հատած ադրբեջանցու մասին։
- Չկա այնպիսի մի սահման, շփման գիծ աշխարհում, որ մարդ անցած չլինի։
- Մարդն անցել է, հիմա պետք է վերադարձնենք իրենց․ Փաշինյանը՝ ՀՀ սահմանը հատած ադրբեջանցի հովվի մասին։
- ԵԱՏՄ-ին ՀՀ անդամակցությունը կասեցնելու հետևանքների վերաբերյալ զեկույցի մասին կարող եմ ասել՝ կապրենք, կտեսնենք։
- ԵԱՏՄ-ից Հայաստանին հեռացնելու նման կանոնադրական հնարավորություն չկա։ Իսկ ինչո՞ւ մինչև այսօր ՀԱՊԿ-ից Հայաստանին չեն հեռացնում, թեպետ այդ կանոնադրական հնարավորությունը կա։
- Ես կարծում եմ, որ մենք 2027- 2028 թթ-ին խաղաղության պայմանագիրը կստորագրենք, էս տարի դժվար հասցնենք։ Պետք է Ադրբեջանի հետ աշխատենք։
- TRIPP նախագիծը մենք հիմա սկսում ենք։ Տնտեսական մեր ընթացիկ մարտահրավերը կառավարելու համար շատ էական է, որ օր առաջ մենք TRIPP նախագիծն իրագործենք, այդ թվում՝ Հայաստան-Ադրբեջան ու Հայաստան-Թուրքիա երկաթուղային հաղորդակցությունը բացվի։
- Ես չեմ կարող և չեմ ուզում մեկնաբանել Ադրբեջան-Թուրքիա հարաբերությունները, որովհետև դա Ադրբեջանի և Թուրքիայի գործն է։ Մենք ունենք մեր հարաբերություններն Ադրբեջանի և Թուրքիայի հետ և աշխատելու ենք այդ ուղղությամբ։
- Սահմանադրություն փոխելը մեր ներքին խնդիրն է։ Մենք պետք է ունենանք նոր Սահմանադրություն։ Կփորձենք համոզել ընդդիմության մեր գործընկերներին, որ սա շատ կարևոր հարց է։ Չստացվեց, ուրեմն կգնանք ուրիշ սցենարներով, այդ թվում՝ կարող ենք նաև արտահերթ ընտրություններ անել։ Իսկ ո՞վ է ասել, որ նման սցենարը բացառված է։
- Ո՛չ, չկա՛ երաշխիք, որ գազի գինը չի թանկանա, ինչի նախկինում երաշխիք եղել ա՞, գազը պարբերաբար թանկացել ա։
- Կա՛մ մենք սկյուռիկի ցիկլից դուրս ենք գալու, կա՛մ ես ՀՀ-ում անելիք չունեմ։
- Ովքեր խոսում են տնտեսությունում ապոկալիպսիսի մասին, տնտեսությունից չեն հասկանում։
