Արցախի Հանրապետության նախագահ Սամվել Շահրամանյանն անդրադարձել է Նիկոլ Փաշինյանի այն հայտարարությանը, թե Արցախ վերադառնալու արցախցիների պատկերացումներն իրատեսական չի համարում։
«Մենք տարբերակներ չենք քննարկել և որևէ առաջարկ չենք ներկայացրել ՀՀ կառավարությանը, վերադարձը մեր իրավունքն է և այն չի կարող հակասել ՀՀ պետական շահերին»,-լրագրողների հետ զրույցում ասել է Սամվել Շահրամանյանը։
Նա նշել է, որ տեղահանությունից հետո իրենք որդեգրել են քաղաքականություն, ըստ որի՝ Հայաստանի Հանարպետության անվտանգությունն առաջնահերթություն է։
«Սա ևս մեր հայրենիքի հիմնական մասն է, և մենք ամեն ինչ պետք է անենք, որ չվտանգենք այն գործընթացները, որոնք հիմա իրականացվում են ՀՀ-ի իշխանությունների կողմից, և չվնասենք անվտանգային համակարգին։ Սակայն մենք տեսնում ենք, որ տարբեր առիթներով մանիպուլացվում է այդ հարցը՝ կապված Արցախի լուծարման հետ»,-ասել է Շահրամանյանը։
Անդրադառնալով Փաշինյանի արդարանալուն, թե ինքը չի ստորագրել Արցախի լուծարման մասին փաստաթուղթը, Շահրամանյանն արձագանքել է․ «Մենք ստիպված ենք եղել ստորագրել, ինչը հնարավորություն է տվել ապահովել խաղաղ բնակչության անվտանգ տեղափոխումը Հայաստան»։
Նախագահը տեղեկացրել է, որ այդ փաստաթուղթը հնարավորություն է տվել նաև տեղափոխել Զինված ուժերը՝ նախարարից մինչև զինվոր, ուժային կառույցների պաշտոնյաները։ «Ցավոք, ունեցել ենք նաև պատանդներ՝ ի դեմս մեր ռազմաքաղաքական ղեկավարության։
Ինչ վերաբերում է այդ փաստաթղթին, ուզում եմ մեր հանրությանը տեղեկացնել, որ հենց սկզբից մենք տեղյակ էինք, որ այդ փաստաթուղթը հակասահմանադրական է, հակաօրինական է և այդ փաստաթուղթը չի ստացել իրավական ուժ, այն պաշտոնապես չի հրապարակվել, չի տեղադրվել իրավական համակարգում, որից հետո միայն կարելի էր այդ փաստաթուղթը նորմատիվ ակտ համարել»,-մանրամասնել է նախագահը։
Նա նշել է, որ Հայաստան տեղափոխվելուց հետո, բնակչության կարծիքն էլ հաշվի առնելով, այդ փաստաթղթի վերաբերյալ կայացրել են որոշում։ «Ես այդ որոշման մասին գրավոր տեղեկացրել եմ Հայաստանի կառավարությանը՝ ի դեմս վարչապետի, իր կից փաստաթղթերով։ Եվ այսօր խոսել այդ փաստաթղթի՝ ուժ ունենալու մասին, անիմաստ է, և դա չի համապատասխանում իրականությանը»։
