Հանդիպել են Իրանի նախագահն ու Ադրբեջանի փոխվարչապետը
Իրանն աջակցում է բոլոր այն նախագծերին, որոնք էլ ավելի կզարգացնեն իսլամական երկրների հարաբերությունները, ասել է Իրանի նախագահ Մասուդ Փեզեշքիանն Ադրբեջանի փոխվարչապետ Շահին Մուստաֆաևի հետ հանդիպմանը։ Հայտնում է Mehr գործակալությունը:
Հանդիպման ընթացքում Փեզեշքիանն ընդգծել է, որ Իրանը կարծում է, որ չպետք է անտեսել որևէ երկրի ինքնիշխանությունը։ Նա ընդգծել է, որ համատեղ աշխատելով՝ տարածաշրջանի պետությունները կարող են լուծել իրենց հարցերը։
«Մենք ողջունում ենք երկու երկրների միջև երկաթուղային և մայրուղային երթուղիների ստեղծումը, ինչպես նաև ցանկանում ենք շարունակել և ընդլայնել համագործակցությունն էներգետիկայի և գյուղատնտեսության ոլորտներում, և մենք հավատարիմ ենք այն ամենին, ինչ պայմանավորվածություն է ձեռք բերվել այդ ոլորտներում», – ասել է Իրանի նախագահը:
Մուստաֆաևն իր հերթին ասել է, որ Բաքուն պատրաստ է ընդլայնել հարաբերություններն Իրանի Իսլամական Հանրապետության հետ։
