Ադրբեջանի ռազմական կցորդը ձերբակալվել է Ստամբուլում՝ 70 կգ ոսկով. լրատվամիջոցներ
Ստամբուլում մաքսանենգության դեմ պայքարի վարչությունը ձերբակալել է Ադրբեջանի քաղաքացի Քահրաման Շամիլ օղլու Մամեդովին, ով, ըստ ԶԼՄ-ների տեղեկության, Ադրբեջանի ռազմական կցորդ է։ Որոշ աղբյուրներ հայտնում են, որ նրան բերման են ենթարկել Ստամբուլի օդանավակայանում, մյուսները տեղեկացնում են, որ գործողությունը տեղի է ունեցել Ստամբուլի Սարիյեր թաղամասի Vadi Istanbul առևտրի կենտրոնի մոտ։ Խուզարկության ընթացքում Մամեդովից առգրավվել է 70 կգ ոսկի։
Իշխանությունները հայտնել են, որ ոսկու ծագման և նպատակային նշանակության մասին բավարար տեղեկատվություն չի տրամադրվել: Ենթադրվում է, որ Մամեդովը կարող էր փորձել օգտագործել իր դիվանագիտական անձեռնմխելիությունը Թուրքիայի տարածքով ապօրինի ոսկի տեղափոխելու համար։ Չնայած դիվանագիտական կարգավիճակը որոշակի արտոնություններ է տալիս միջազգային պայմանագրերով՝ նման գործողությունները համարվում են օրենքին հակասող և քրեական հանցագործություն: Այս հարցով Ստամբուլի գլխավոր դատախազությունը բազմակողմանի հետաքննություն է սկսել։ Միջադեպից հետո Ադրբեջանում սկսվել են վարչական և դատական հետաքննություններ։ Հետաքննության նպատակն է պարզել՝ արդյոք Մամեդովը մաքսանենգության կազմակերպված ցանցի մա՞ս է կազմել, թե՞ գիտակցաբար կամ անգիտակցաբար ներգրավված է եղել գործողության մեջ։ Միջադեպը վերսկսել է միջազգային բանավեճը դիվանագիտական անձեռնմխելիության չարաշահման վերաբերյալ։
Փորձագետները նախազգուշացնում են, որ առանց ոսկու ծագման և նպատակների մասին լրացուցիչ մանրամասների, գործը կարող է վերածվել դիվանագիտական ճգնաժամի: Ակնկալվում է, որ Թուրքիայի և Ադրբեջանի սերտ կապերը վճռորոշ դեր կխաղան խնդրի լուծման գործում։ Ե՛վ Թուրքիան, և՛ Ադրբեջանն ակնկալում են թափանցիկ մոտեցում՝ դիվանագիտական հարաբերությունների վրա հնարավոր բացասական ազդեցությունը նվազագույնի հասցնելու համար։
