Մարդկության դեմ Ալիևի հանցագործությունները և Արցախում էթնիկ զտման նրա միտումնավոր արշավը պետք է հետևանքներ ունենան․ Ֆրենկ Փալոն
Խոսքերը պետք է վերածվեն գործողությունների, և Ադրբեջանի նախագահը
պետք է պատասխանատվության ենթարկվի Արցախում էթնիկ զտման իր արշավի համար․
ասել է ԱՄՆ կոնգրեսական Ֆրենկ Փալոնը՝ արձագանքելով ԱՄՆ պետքարտուղար Էնթոնի Բլինքենի
և Ադրբեջանի նախագահ Իլհամ Ալիևի հեռախոսազրույցին։
«Պետքարտուղար Բլինքենն իրավացիորեն կոչ է անում դադարեցնել Լաչինի
միջանցքի շրջափակումը, սակայն այս խոսքերին պետք է հետևեն իմաստալից գործողություններ,
հատկապես այն պարագայում, որ Արցախում հումանիտար ճգնաժամը շարունակում է վատթարանալ»,
– գրել է Փալոնը X-ի իր միկրոբլոգում։
Կոնգրեսականի խոսքով՝ Կովկասում խաղաղություն չի հաստատվի, եթե
«Ալիևը պատասխանատվության չենթարկվի հայ ժողովրդի դեմ Ադրբեջանի ագրեսիայի համար»։
«Մարդկության դեմ Ալիևի հանցագործությունները և Արցախում էթնիկ
զտման նրա միտումնավոր արշավը պետք է հետևանքներ ունենան», – գրել է նա։
