Թուրքիայում ընդդիմությունը ստորագրահավաք է սկսել Էրդողանին անվստահություն հայտնելու համար
Թուրքիայի գլխավոր ընդդիմադիր Ժողովրդահանրապետական կուսակցության առաջնորդ Օզգյուր Օզելը հայտարարել է մեծամասշտաբ ստորագրահավաք՝ հանրապետության նախագահ Ռեջեփ Թայիփ Էրդողանին անվստահություն հայտնելու և արտահերթ նախագահական ընտրություններ անցկացնելու նպատակով․ գրում է Cumhuriyet պարբերականը։
Կուսակցությունը իր 21-րդ արտահերթ համագումարն է անցկացնում Թուրքիայի մայրաքաղաք Անկարայի մշակութային կենտրոնում։
«Երկուշաբթի օրվանից սկսում ենք ստորագրահավաք մեր երկրի փողոցներում, որպեսզի Էրդողանին ցույց տանք անվստահության վերաբերյալ ամենահավակնոտ դիրքորոշումը։ Մենք պատրաստ ենք հունիսին արտահերթ ընտրությունների։ Եթե մինչև հունիս չհասցնեք, պատրաստ եղեք մինչև նոյեմբերի առաջին կեսը, դուրս եկեք և մրցեք մեր թեկնածուի հետ»,- ասել է Օզելը` դիմելով Էրդողանին։
