ԱՄՆ նոր պատժամիջոցները բացասական ազդեցություն կունենան բանակցությունների գործընթացի վրա․ Արաղչի
Իրանի արտաքին գործերի նախարար Աբբաս Արաղչին դատապարտել է Վաշինգտոնի կողմից Թեհրանի նկատմամբ վերջին պատժամիջոցները, որոնք սահմանվել են Իրանի և ԱՄՆ-ի միջև անուղղակի բանակցությունների ընթացքին զուգահեռ. գրում է Mehr գործակալությունը։
Ըստ նախարարի՝ պատժամիջոցների սահմանումը բացասական ուղերձ է հղում և կասկածի տակ դնում Վաշինգտոնի լրջությունը բանակցությունների նկատմամբ։
«Եթե բանակցությունների ընթացքում հակառակ կողմերը ներքաշվում են սադրիչ գործողությունների մեջ, ապա դա կարող է կասկածի տակ դնել նրանց լրջությունը», – ասել է Արաղչին նախարարների կաբինետի նիստի շրջանակներում լրագրողների հետ զրույցում։
Դիվանագետն ընդգծել է, որ ԱՄՆ-ում տարբեր տեսակետներ կան բանակցությունների առումով։
«Մենք տեղյակ ենք ԱՄՆ-ում ներքին տարաձայնությունների և ակտիվ լոբբիստական ջանքերի մասին: Մենք ուշադիր հետևում ենք այս բոլոր զարգացումներին և համապատասխան որոշումներ կկայացնենք», – ասել է նախարարը:
Նա հիշեցրել է, որ բանակցությունների հաջորդ փուլը տեղի կունենա մայիսի 3-ին Հռոմում՝ Օմանի միջնորդությամբ։ Մինչ այդ իրանական կողմը հանդիպում կունենա «եվրաեռյակի» երկրների հետ։
