Գիտնականները զգուշացնում են՝ կլիմայի փոփոխության պատճառով ռեկորդային ջերմաստիճան և ավելի ուժեղ փոթորիկներ են սպասվում

Համաշխարհային օդերևութաբանական կազմակերպության և Մեծ Բրիտանիայի օդերևութաբանական գործակալության կողմից չորեքշաբթի հրապարակված հնգամյա կանխատեսման համաձայն՝ կա 80% հավանականություն, որ աշխարհը հաջորդ հինգ տարիների ընթացքում կգերազանցի տարեկան ջերմաստիճանի ևս մեկ ռեկորդ․ գրում է CBS News-ը։

Նշվում է, որ շատ հավանական է, որ աշխարհը կրկին գերազանցի 10 տարի առաջ սահմանված միջազգային ջերմաստիճանի շեմը։

«Գլոբալ միջին ջերմաստիճանի բարձրացումը կարող է վերացական թվալ, բայց իրական կյանքում դա նշանակում է ծայրահեղ եղանակային պայմանների ավելի մեծ հավանականություն՝ ավելի ուժեղ փոթորիկներ, ավելի ուժեղ տեղումներ, երաշտներ», – նշել է Կոռնելի համալսարանի կլիմայագետ Նատալի Մահովալդը։

Փորձագետը նշում է, որ «գլոբալ միջին ջերմաստիճանի բարձր մակարդակը նշանակում է ավելի շատ կյանքերի կորուստ»։

Հետազոտությունն իրականացրած երկու գործակալությունները հայտնել են, որ առաջին անգամ կա հնարավորություն, թեև չնչին, որ մինչև 2030 թվականը աշխարհի տարեկան ջերմաստիճանը կխաթարի Փարիզի կլիմայական համաձայնագրի՝ գլոբալ տաքացումը 1.5 աստիճան Ցելսիուսով սահմանափակելու ջանքերը՝ գրանցելով մտահոգիչ 2 աստիճան Ցելսիուս տաքացում։