Բողոքի ակցիա ԿԽՄԿ գրասենյակի դիմաց․ արցախցի երիտասարդները՝ ԿԽՄԿ աշխատակցին թույլ չտվեցին դուրս գալ շենքից
Այսօր մի խումբ երիտասարդներ հավաքվել են Հայաստանում
ԿԽՄԿ գրասենյակի դիմաց և կառույցից պահանջում են ապահովել վթարի հետևանքով զոհված
21-ամյա Հելեն Դադայանի մարմնի տեղափոխությունը Արցախի Հանրապետություն։
Ակցիայի ժամանակ միջադեպ է տեղի ունեցել ակցիայի մասնակիցների ու ԿԽՄԿ աշխատակցի միջև։
Այն ժամանակ, երբ երիտասարդները որոշում էին կայացրել արգելափակելու ԿԽՄԿ շենքի մուտքը՝
կազմակերպության աշխատակիցներից մեկը փորձել է դուրս գալ՝ հայտնելով, որ աշխատանքային
օրվա ավարտին ցանկանում է տուն գնալ։
Արցախցի երիտասարդները թույլ չեն տվել աշխատակցին դուրս գալ շենքից՝ հայտարարելով,
որ իրենք ևս ամիսներ շարունակ չեն կարողանում գնալ տուն ու տեսնել իրենց հարազատներին։
ԿԽՄԿ ներկայացուցչի և երիտասարդների միջև վեճ է սկսվել։
«Ես նույնպես ցանկանում եմ գնալ իմ տուն։ Ես իմ մորն ու եղբորը չեմ տեսել՝ երկու տարի»,-
ասաց ակցիայի մասնակիցներից մեկը, ինչին ի պատասխան ԿԽՄԿ ներկայացուցիչն ասաց, որ իրենք
անում են հնարավորը՝ իրենց իրավասությունների սահմաններում։ Աշխատակցին, երիտասարդներն
այդպես էլ թույլ չտվեցին դուրս գալ շենքից։
