ԱՄՆ Սենատի արտաքին հարաբերությունների հանձնաժողովի
նախագահ Բոբ Մենենդեսն ու սենատոր Ալեքս Պադիլլան պաշտոնական նամակ են հղել ՄԱԿ–ի Անվտանգության
խորհրդում ԱՄՆ մշտական ներկայացուցիչ Լինդա Թոմաս-Գրինֆիլդին Լեռնային Ղարաբաղի հարցով՝
հորդորելով կոշտ դիրքորոշում որդեգրել ՄԱԿ-ի Անվտանգության խորհրդի
նիստում և հասցեագրել ԼՂ-ում տիրող հումանիտար ճգնաժամը:
Նրանք հիշեցրել են, որ Ադրբեջանի գործողությունները ոչ այլ ինչ են, քան դարեր շարունակ
այնտեղ ապրած հայ համայնքի էթնիկ զտման փորձ: Մենենդեսն ու Պադիլլան կոչ են արել ԱՄՆ
մշտական ներկայացուցչին համագործակցել ՄԱԿ-ի Անվտանգության խորհրդի բոլոր անդամների
հետ, որպեսզի ճնշում գործադրեն Ադրբեջանի կառավարության վրա՝ ԼՂ շրջափակումը վերացնելու
և կանխելու Լեռնային Ղարաբաղի բնակչության էթնիկ զտմանն ուղղված համակարգված ջանքերը։
Նրանք կոչ են արել նաև բանաձև ընդունել շրջափակման դադարեցման վերաբերյալ։
