Թուրքիայի արտգործնախարարությունը ողջունել է Ադրբեջանի նախագահի
աշխատակազմի և Հայաստանի վարչապետի գրասենյակի համատեղ հայտարարությունը՝ գերիների
ազատ արձակման վերաբերյալ։
«Ողջունում ենք երկու երկրի միջև վստահության ամրապնդմանն ուղղված
որոշ կոնկրետ քայլեր ձեռնարկելու որոշումը և աջակցում վստահության ամրապնդմանն ուղղված
լրացուցիչ քայլերի շուրջ քննարկումները շարունակելու որոշմանը։ Մաղթում ենք Ադրբեջանի
և Հայաստանի միջև խաղաղության պայմանագրի շուտափույթ ստորագրում, որը կդառնա Հարավային
Կովկասում մշտական խաղաղության և կայունության հաստատման գործընթացում առանցքային իրադարձություններից
մեկը», – ասված է հայտարարությունում։
Հիշեցնենք, որ երեկ տեղեկություն էր տարածվել Ադրբեջանում պահվող
32 ռազմագերիների և Հայաստանում պահվող 2 ադրբեջանցի զինծառայողների փոխանակության
վերաբերյալ։
