Քայլեր ձեռնարկել՝ ազատելու Բաքվի հայ պատանդներին․ Արամ Ա-ն հանդիպել է Կանադայի վարչապետին
Ն.Ս.Օ.Տ.Տ. Արամ Ա կաթողիկոսը Օտտավայում հանդիպել է Կանադայի վարչապետ Մարկ Քարնիի հետ։ Շուրջ մեկ ժամ տևած հանդիպման ժամանակ քննարկվել են մի շարք կարևոր տարածաշրջանային հարցեր՝ ներառյալ Լիբանանի, Սիրիայի, Միջին Արևելքի, Հայաստանի, Պաղեստինի և Գազայի վիճակը։ Վեհափառ Հայրապետը ներկայացրել է իր տեսակետներն ու մտահոգությունները՝ արձագանքելով Կանադայի վարչապետի հետաքրքրությանը նշված թեմաների շուրջ․ տեղեկացնում է Կիլիկիո կաթողիկոսարանի Facebook-ի էջից։
Արամ վեհափառն անդրադարձել է Արցախի հարցին և հատկապես Ադրբեջանի բանտերում ապօրինաբար պահվող Արցախի ղեկավարության ճակատագիրը։ Նա առաջարկել է Կանադայի վարչապետին ձեռնարկել հատուկ քայլեր՝ նպաստելու քաղաքական բանտարկյալների շուտափույթ ազատ արձակմանը, Արցախի ժողովրդի վերադարձին, ինքնիշխանության իրավունքի վերականգնմանը, ինչպես նաև Արցախի կրոնական ու մշակութային ժառանգության պահպանմանը։
