Ադրբեջանի պատվիրակությունը չի մասնակցի Եվրանեսթի խորհրդարանական վեհաժողովի՝ Երևանում կայանալիք լիագումար նիստին

Ադրբեջանի խորհրդարանի պատվիրակությունը չի մասնակցի Եվրանեսթի վեհաժողովի 12-րդ լիագումար նիստին, որը տեղի կունենա հոկտեմբերի 28-30-ը Երևանում։ Այս մասին ադրբեջանական ԶԼՄ-ներին հայտնել է Եվրանեսթում ադրբեջանական պատվիրակության ղեկավար Թահիր Միրկիշիլին։

Նրա խոսքով՝ Եվրախորհրդարանի փաստաթղթերն ու հայտարարությունները, որոնք կազմում են Եվրանեսթի վեհաժողովի գործունեության կեսը, «հակասում են Ադրբեջանի ինքնիշխանությանը և տարածքային ամբողջականությանը»։

Ավելի վաղ վրացական պատվիրակության ղեկավար Լևան Մախաշվիլին էր հայտարարել, որ Վրաստանը հրաժարվել է մասնակցել Եվրանեսթի խորհրդարանական վեհաժողովին։

Վեհաժողովի համանախագահներին և բյուրոյի անդամներին ուղղված նամակում նա գրել է, որ վերջին շրջանում կազմակերպության գործունեությունը լուրջ մտահոգություններ է առաջացրել։ Մախաշվիլիի խոսքով՝ Եվրախորհրդարանի որոշ անդամների թշնամական հռետորաբանությունն ու գործողությունները հակասում են գործընկերության և փոխադարձ հարգանքի սկզբունքներին, որոնք պետք է պահպանի այս հարթակը։