«Վրացական երազանքի» քաղաքականության պայմաններում Վրաստանը չի դառնա ԵՄ անդամ նույնիսկ 2030 թվականին. Մարթա Կոս
«Վրացական երազանք» կուսակցության վարած քաղաքականության պայմաններում Վրաստանը ԵՄ անդամ չի դառնա նույնիսկ 2030 թվականին․ վրացական «Պիրվելի» թերթին տված հարցազրույցում ասել է Եվրոպական միության ընդլայնման հարցերով հանձնակատար Մարթա Կոսը․ գրում է apsny.ge-ն։
Նրա խոսքով՝ «Վրացական երազանքը» քարոզչություն է վարում Վրաստանի՝ Եվրամիությանն անդամակցելու դեմ։
«Լրագրողների, քաղաքական հակառակորդների և քաղաքացիական հասարակության ներկայացուցիչների ձերբակալությունը չի համապատասխանում ԵՄ անդամակցության թեկնածու երկրից մեր սպասելիքներին։ Ահա թե ինչու ես կոչ եմ անում Վրաստանի իշխանություններին դադարեցնել հակաժողովրդավարական քայլերը, որոնք ավելի են հեռացնում Վրաստանին Եվրամիությունից»,- ասել է նա։
«Մենք մշակում ենք անվիզա ռեժիմը կասեցնելու նոր մեխանիզմ, որը կհաստատվի նոյեմբերին, որից հետո մենք կքննարկենք բազմաթիվ տարբերակներ և հնարավորություններ Վրաստանի հետ անվիզա ճանապարհորդության վերաբերյալ։ «Վրացական երազանքը» պարզապես պետք է լսի և ավելի ուշադիր նայի, թե ինչ ենք անում Եվրոպայում»,- հավելել է նա։
