«Քիմիկների» զորամասի անհետ կորած զինծառայողների ծնողները հավաքվել
են կառավարության շենքի դիմաց՝ պահանջելով հանդիպում Նիկոլ Փաշինյանի հետ։
«Ուզում ենք Փաշինյանի հետ հանդիպել, որ իմանանք՝ ինչի
սպասենք մեր երեխեքի գալու հետ կապված», – նշեց ծնողներից Հռիփսիմե Հակոբյանը՝ հավելելով,
որ անհետ կորած զինծառայողների ծնողները մատնված են անուշադրության։
Ծնողներից Կարինե Մանավազյանն էլ ասաց, որ անհետ կորածների, գերիների
հարցը պետք է կառավարությունն առաջնային լուծեր, ոչ թե «ասֆալտ փռեր»։
«Էդ ո՞նց եղավ, որ ընտրություններից 5 օր առաջ գերի եկավ, 5 օր
հետո գերի եկավ, ընտրությու՞ն էր, պետք էր, հա՞, երևի»,-ասաց նա։
Ծնողներն այս պահին անժամկետ նստացույց են հայտարարել կառավարության
դիմաց՝ մինչև նրանց կընդունի Փաշինյանը։
Հիշեցնենք, որ Էջմիածնի «Քիմիկների» զորամասից զինծառայողները
2020 թվականի հոկտեմբերի 21-ին մեկնել էին Կովսականում մարտական գործողություններին
մասնակցելու, սակայն ծնողների խոսքով՝ սխալ հրամանի պատճառով հայտնվել էին ադրբեջանական
շրջափակման մեջ, և մինչև այս պահը զինծառայողներից որևէ տեղեկություն չկա։ Ծնողները
հետագայում համացանցից լուսանկարներ և տեսանյութեր են գտել, նույնականացրել իրենց որդիների
հետ, և այդ տվյալները փոխանցել կառավարություն, ՊՆ և ԱԱԾ։