Թրամփը կրկին կին լրագրողի է վիրավորել՝ նրան անվանելով «տգեղ»

ԱՄՆ նախագահ Դոնալդ Թրամփը կրկին վիրավորել է կին լրագրողի՝ այս անգամ անդրադառնալով նրա արտաքինին․ գրում է NBC News-ը։

Truth Social սոցցանցում գրառման մեջ Թրամփը The New York Times-ի լրագրող Քեյթի Ռոջերսին անվանել է «երրորդ կարգի լրագրող, որը տգեղ է թե՛ ներսից, թե՛ դրսից»։

Պատճառը Ռոջերսի և The New York Times-ի մեկ այլ տղամարդ լրագրողի համահեղինակած հոդվածն է, որում ասվում էր, որ Թրամփը պաշտոնավարման ընթացքում, կարծես, ծերանում է։ Գրառման մեջ Թրամփը նաև վիճարկել է հոդվածի ճշմարտացիությունը՝ նշելով. «Նրանք գիտեն, որ դա այդպես չէ»:

Թրամփն իր գրառման մեջ չի անդրադարձել մյուս լրագրողին, իսկ The New York Times-ն անվանել է «էժանագին» թերթ և «ժողովրդի թշնամի»։

Նշվում է, որ սա վերջին շաբաթների ընթացքում ԱՄՆ նախագահի կողմից կին լրագրողին անձնական վիրավորանք հասցնելու երրորդ դեպքն է։ Նա լրագրողներից մեկին էլ անվանել էր «խոզուկ»։