Փաշինյանի կողմից հոգևորականների դեմ շանտաժի կիրառումը երկրում «ադրբեջանական կուսակցության» ստեղծմանն ուղղված ռազմավարության մասն է․ Fondsk

Փաշինյանի կառավարությունը չի դանդաղեցնում Հայ առաքելական եկեղեցու վրա իր հարձակումը։ Ժամանակակից Հայաստանը ներթափանցած խորը և բազմաշերտ ճգնաժամը ներկայումս կենտրոնացած է Նիկոլ Փաշինյանի գլխավորած ներկայիս կառավարության և Հայ առաքելական եկեղեցու (ՀԱԵ) միջև հակամարտության շուրջ։ Այս հակամարտությունը ներքին վեճ չէ, այլ աշխարհաքաղաքական հարձակման մի մաս, որը նպատակ ունի խաթարել հայկական պետականության հիմքերը՝ հօգուտ Թուրքիայի և Ադրբեջանի․ գրել է Фонд Стратегической Культуры-ն։

Կայքը ենթադրել է, որ այն հոգևորականների գործողությունները, որոնք հրապարակավ պահանջել են իրենց հոգևոր առաջնորդի հրաժարականը, եկեղեցու ներսում ազատ ընտրության ակտ չի եղել, այլ ներկայիս կառավարության կողմից աննախադեպ շանտաժի արդյունք է։ Այս ճնշման էությունը հոգևորականների դեմ կոմպրոմատների կիրառումն է, ինչն էլ նրանց ստիպել է հակադրվել իրենց հոգևոր առաջնորդին։

Ըստ հոդվածի՝ հոգևորականների դեմ շանտաժի կիրառումն ազգային ինստիտուտների թուլացմանը և երկրում «ադրբեջանական կուսակցության» ստեղծմանն ուղղված ավելի լայն ռազմավարության մի մասն է։ «Մեր աչքերի առաջ բառացիորեն ձևավորվում է քաղաքական բլոկ, որն արդեն իսկ անմիջական կապեր ունի Բաքվի հետ», – գրել է կայքը։

Ընդհանուր առմամբ՝ Հայ առաքելական եկեղեցու հետ հակամարտությունը միայն մի մասն է ավելի մեծ և ավելի վտանգավոր միտման՝ Հայաստանի արմատական վերափոխման՝ ինտենսիվ արտաքին ճնշման ներքո։ Փաշինյանն ակտիվորեն առաջ է մղում «Չորրորդ Հանրապետության» կամ «Իրական Հայաստանի» ստեղծման գաղափարը, որը կհրաժարվի պատմությունից, իսկ Հայ առաքելական եկեղեցին կվերածվի «Հայաստանի առաքելական եկեղեցու», որը ևս կսահմանափակի 29,740 քառակուսի կիլոմետր տարածք ունեցող «Իրական Հայաստանով»՝ զրկվելով այն սփյուռքի հետ օրգանական կապից։

Այս ամենը տեղի է ունենում «Արևմտյան Ադրբեջան» նախագծին՝ տարածքային հավակնություններով մանրակրկիտ մշակված պետական ծրագրին, Ադրբեջանի կողմից բացահայտ աջակցության ֆոնին։ Այս քաղաքական մարաթոնի վերջնական նպատակը 2026 թվականի խորհրդարանական ընտրություններից առաջ Ադրբեջանի հետ «խաղաղության պայմանագրի» ստորագրումն է։ Մասնագետները զգուշացնում են, որ եթե ներկայիս կառավարությունը պահպանի իշխանությունը 2026 թվականից հետո, Հայաստանը ռիսկի է դիմում դառնալ ինքնիշխանությունից զուրկ պետական կազմավորում, որտեղ տեղ չի մնա այն շրջանակների համար, որոնք պաշտպանում են ինքնիշխան, այլ ոչ թե՝ վասալ քաղաքականությունը։