Հունաստանում բախումներ են տեղի ունեցել ֆերմերների և ոստիկանության միջև

Հունական Կրետե կղզում ԵՄ սուբսիդիաների ուշացման դեմ բողոքի ցույցերի ժամանակ բախումներ են տեղի ունեցել ֆերմերների և ոստիկանության միջև․ գրում է Euronews-ը։

Բողոքի ցույցերը կազմակերպվել են կղզու երկու միջազգային օդանավակայանների մոտակայքում։

Ցուցարարները քարեր են նետել ոստիկանական մեքենաների ուղղությամբ՝ վնասելով դրանք և շրջելով մեքենաներից մեկը ոստիկանների հեռանալուց հետո։

Լարվածության սրման պատճառով ոստիկանությունն արցունքաբեր գազ է կիրառել։

Անկարգությունները նոյեմբերի վերջից ի վեր համազգային բողոքի ցույցերի մասն են կազմում։

Դիմելով ցուցարարներին՝ վարչապետ Կիրիակոս Միցոտակիսը նշել է, որ վճարումներն ու աջակցությունը կտրամադրվեն մինչև դեկտեմբերի վերջ։