Ադրբեջանում կին զինծառայողների նախնական պայմանագրային ժամկետը 3 տարուց կրճատվում է մինչև 6 ամիս
Ադրբեջանում կին զինծառայողների նախնական պայմանագրային ժամկետը 3 տարուց կրճատվում է մինչև 6 ամիս։ Այս հարցն արտացոլված է Ադրբեջանի «Զինվորական ծառայության կանոնակարգը հաստատելու մասին» և «Զինվորական պարտքի և զինվորական ծառայության մասին» օրենքներում առաջարկվող փոփոխություններում, որոնք քննարկվել են խորհրդարանի պաշտպանության, անվտանգության և կոռուպցիայի դեմ պայքարի հանձնաժողովի նիստում։
Նշվում է, որ առաջարկվող օրենքի նախագծի հիմնական նպատակն է ավելի արդյունավետ կազմակերպել երկարաձգված զինվորական ծառայության ընդունված կին զինծառայողների ընդունման գործընթացը, ինչպես նաև վերացնել այս ոլորտում առկա գործնական դժվարությունները։
«Գործնականում տղամարդ քաղաքացիներն իրենց ակտիվ զինվորական ծառայությունն ավարտում են երկարաձգված ծառայության անցնելուց առաջ, ուստի՝ նրանք արդեն ավարտել են հարմարվողականության փուլը։ Սակայն կանայք, որոնք անմիջապես զորակոչվում են երկարաձգված ծառայության՝ առանց իրենց ակտիվ զինվորական ծառայությունն ավարտելու, սկզբնական փուլում դժվարությունների են հանդիպում զինվորական ծառայության պայմաններին հարմարվելու հարցում»,- նշվել է նախագծում։
Շեշտվում է, որ կանանց հետ անմիջապես երեք տարվա նախնական պայմանագիր կնքելը հանգեցնում է նրան, որ նրանք ստանձնում են երկարաժամկետ պարտավորություններ՝ առանց ադապտացիայի շրջան անցնելու։ Հետագայում, սովորաբար ընտանեկան հանգամանքների և այլ օբյեկտիվ պատճառներով պայմանավորված, սա հանգեցնում է պահեստազորում վաղաժամ զորացրման և բացասաբար է անդրադառնում անձնակազմի կայունության վրա։ Հաշվի առնելով վերը նշվածը՝ օրինագծում առաջարկվում է ավելացնել դրույթ, որը կանանց համար նախնական պայմանագրի ժամկետը կրճատում է 3 տարուց մինչև 6 ամիս։
