Վատիկանը չի մասնակցի «Խաղաղության խորհրդի» նիստին
Վատիկանը չի մասնակցի ԱՄՆ նախագահ Դոնալդ Թրամփի «Խաղաղության խորհուրդ» նախաձեռնության նիստին․ գրում է Reuters գործակալությունը՝ հղում անելով Վատիկանի դիվանագիտական բարձրաստիճան պաշտոնյա կարդինալ Պիետրո Պարոլինին։
Պարոլինը նշել է, որ ճգնաժամային իրավիճակների կառավարման հարցերով պետք է զբաղվի Միավորված ազգերի կազմակերպությունը։
Հռոմի պապ Լևոն XIV-ը՝ ամերիկացի առաջին պապը և որոշ հարցերում Թրամփի քաղաքականության քննադատը, դեռևս հունվարին էր հրավիրվել խորհրդին միանալու։
Սուրբ Աթոռը «չի մասնակցի Խաղաղության խորհրդին իր յուրահատուկ բնույթի պատճառով, որն ակնհայտորեն տարբերվում է այլ պետությունների բնույթից», – ասել է Պարոլինը։
Խորհուրդն, ի սկզբանե, նախատեսված էր Գազայում ճգնաժամի կառավարման համար։ Թրամփը, սակայն, հայտարարեց, որ խորհուրդը, իր նախագահությամբ, կընդլայնվի՝ համաշխարհային հակամարտությունները լուծելու նպատակով։
Խորհրդի առաջին նիստը կանցկացվի հինգշաբթի, Վաշինգտոնում․ օրակարգում կլինի Գազայի վերակառուցման հարցը։
