Բաքվում հայերի դեմ դատավճիռները, որի կուլմինացիան Վարդանյանինն էր, ոչ այլ ինչ է, քան «ֆարս»․ Amnesty International
Արձագանքելով Բաքվում 16 էթնիկ հայերից վերջինի՝ Ռուբեն Վարդանյանի 20 տարվա ազատազրկման վճռին՝ Amnesty International միջազգային իրավապաշտպան կազմակերպության Արևելյան Եվրոպայի և Կենտրոնական Ասիայի գծով տնօրեն Մարի Ստրութերսը հայտարարել է, որ դատապարտյալների դեմ դատավճիռները, որի կուլմինացիան Ռուբեն Վարդանյանինն էր, ոչ այլ ինչ է, քան «ֆարս»:
«Այն փաստը, որ Ռուբեն Վարդանյանը և մյուսները՝ իր նման մի քանի քաղաքացիական անձինք, դատվել են ռազմական դատարանում, ինքնին լուրջ մտահոգություններ է առաջացնում և անհամատեղելի է արդար դատավարության երաշխիքների հետ: Մինչդեռ տասնամյակներ շարունակ Լեռնային Ղարաբաղի հակամարտության զոհերը՝ թե՛ Հայաստանում, թե՛ Ադրբեջանում, արժանի են ճշմարտության, արդարադատության, փոխհատուցման և չկրկնվելու երաշխիքների, այս դատապարտումները վիրավորանք են միջազգային իրավունքի համաձայն հանցագործությունների բոլոր զոհերի համար»:
Մարի Ստրութերսն ընդգծել է, որ բազմաթիվ, չափազանց լուրջ հանցագործությունների համար մեղադրվող Ռուբեն Վարդանյանը և մյուս մեղադրյալները դատվել են գործնականում փակ նիստերի ժամանակ։ Դրանք հիմնված են եղել «ապացույցների» վրա, որոնք ներկայացվել են մեղադրվողների համար անհասկանալի լեզվով և որոնք բավարար չափով չեն թարգմանվել։ Նույնիսկ մեղադրանքները՝ միայն Վարդանյանի դեմ ավելի քան 40-ը, այդ թվում՝ «ահաբեկչություն» և «մարդկության դեմ հանցագործություններ», դատավարության ընթացքում լիովին հրապարակայնորեն չեն բացահայտվել։ Amnesty International-ն Ադրբեջանի իշխանություններից տեղեկատվություն է խնդրել դատավարության և ապացույցների մասին, բայց պատասխան չի ստացել։
«Ադրբեջանը պետք է կատարի իր պարտավորությունները մարդու միջազգային իրավունքների համաձայն և ապահովի, որ հանցագործությունների համար մեղադրվող բոլոր անձինք դատվեն միջազգային իրավունքի և արդար դատավարության չափանիշների լիարժեք համապատասխանությամբ»,- նշել է Ստրութերսը։
