Տարածքային վեճ, որը ձգվում է տարիներ․ Ճապոնիայի վարչապետը հայտարարել է Ռուսաստանի հետ խաղաղության պայմանագիր կնքելու ցանկության մասին
Ռուսաստանի հետ «տարածքային հարցը» լուծելու և խաղաղության պայմանագիր կնքելու ցանկության վերաբերյալ Ճապոնիայի կառավարության դիրքորոշումը մնում է անփոփոխ․ ТАСС-ի հաղորդմամբ՝ այս մասին հայտարարել է Ճապոնիայի վարչապետ Սանաե Տակաիչին իր երդմնակալության առթիվ խորհրդարանում ունեցած ելույթում։
«Չնայած ճապոնա-ռուսական հարաբերությունները բարդ վիճակում են, Ճապոնիայի կառավարության դիրքորոշումը մնում է անփոփոխ՝ լուծել տարածքային հարցը և կնքել խաղաղության պայմանագիր»,- ընդգծել է նա։
Միևնույն ժամանակ, Ճապոնիայի կառավարության ղեկավարը կրկին քննադատել է Ռուսաստանի գործողություններն Ուկրաինայում՝ շեշտելով հակամարտության արագ դադարեցման անհրաժեշտությունը։
Մոսկվան և Տոկիոն անցյալ դարի կեսից բանակցություններ են վարում՝ Երկրորդ համաշխարհային պատերազմի արդյունքներով խաղաղության համաձայնագիր մշակելու նպատակով։ Համաձայնագրի հիմնական խոչընդոտը հարավային Կուրիլյան կղզիների նկատմամբ իրավունքների շուրջ անհամաձայնությունն է: Պատերազմից հետո ամբողջ կղզեխումբը միացվեց Խորհրդային Միությանը, սակայն Ճապոնիան վիճարկում է Իտուրուպի, Կունաշիրի, Շիկոտանի և մի շարք փոքր անմարդաբնակ կղզիների պատկանելությունը: Միևնույն ժամանակ, ՌԴ արտաքին գործերի նախարարությունը բազմիցս ընդգծել է, որ միջազգային իրավունքով ամրագրված ՌԴ ինքնիշխանությունն այդ տարածքների նկատմամբ չի կարող լինել կասկածի տակ։
