Բելգիայի Լիեժ քաղաքում սինագոգի մոտ պայթյուն է տեղի ունեցել
Բելգիայի Լիեժ քաղաքում սինագոգի մոտ պայթյուն է տեղի ունեցել, հաղորդում է VRT-ն՝ հղում անելով ոստիկանությանը։
Ոչ ոք չի տուժել, սակայն սինագոգը նյութական վնասներ է կրել. պատուհանները կոտրվել են։ Շենքի շրջակայքը շրջափակվել է, իսկ փողոցը՝ փակվել։
Լիեժի քաղաքապետ Վիլի Դեմեյերը միջադեպը որակել է «հակասեմականության բռնի ակտ»։
«Անընդունելի է, որ մենք հակամարտություններն արտասահմանից մեր քաղաք ենք բերում»,- ասել է նա։
Լիեժի ոստիկանության հակաահաբեկչական ստորաբաժանումը հետաքննություն է անցկացնում։
