Հայաստանում պետական աջակցության՝ անպտղության հաղթահարման ծրագրի մեկնարկից մինչև 2023-ի ավարտը ծնվել է 412 երեխա, որից 56-ը՝ զոհված զինծառայողների ընտանիքներում.այս մասին ասուլիսում ասել է Առողջապահության նախարար Անահիտ Ավանեսյանն՝ ամփոփելով 2023 թվականի կատարած աշխատանքները:
«Անպտղության հաղթահարման ծրագիրը մեզ համար կարևոր և անհրաժեշտ ծրագիր է: Պետությունը տարեցտարի մեծացնում է տրամադրվող ծառայությունների շրջանակը, նաև՝ շահառուների թիվը: 2023-ին փոխվեցին տարիքային շեմերը, այսինքն՝ շահառուների շրջանակն ընդլայնվեց: Զոհված զինծառայողների ծնողների համար պետության կողմից նաև տրամադրվում է փոխնակ մայրության ծառայությունը»,-ասել է Ավանեսյանը:
Նախարարը նկատեց, որ սկզբնական շրջանում քիչ է եղել այս ծառայությունից օգտվել ցանկացող անձանց թիվը: Սակայն հետո այս հնարավորությունը ընկալվել է հայրենակիցների կողմից:
«Մենք նկատում ենք, որ զոհված զինծառայողների ընտանիքներում այդ ուրախության ճիչը, որ հնչում է, նաև ոգևորում է այլ ընտանիքների՝ դառնալու շահառու: Այս ծրագրերի շրջանակներում 2023 թվականի ընթացքում զոհված զինծառայողների ընտանիքներում ծնվել է 28 երեխա»,-ասել է Ավանեսյանը՝ հավելելով, որ ծրագրի շրջանակում, ընդհանուր առմամբ, 2023-ին ծնվել է 159 երեխա:
Նախարարությունը մտադիր է օրենսդրական փոփոխություններով հանդես գալ և էլ ավելի մեծացնել շահառուների շրջանակը: Հայաստանում կա ինչպես առաջնային, այնպես էլ երկրորդային անպտղության խնդիր:
