ԵՄ-ն քննարկում է Երևանի և Բաքվի հետ տարածաշրջանում տրանսպորտային ուղիների աջակցության տարբերակները․ Գրոնո

Եվրամիությունը քննարկում է Հայաստանի և Ադրբեջանի իշխանությունների հետ, թե ինչպես կարող է Բրյուսելն աջակցել Հարավային Կովկասում տրանսպորտային ուղիների զարգացմանը․ հայտարարել է Հարավային Կովկասում ԵՄ հատուկ ներկայացուցիչ Մագդալենա Գրոնոն՝ Երևանում կայացած ճեպազրույցի ժամանակ։

«Տարածաշրջանում կայուն խաղաղության կառուցման գործում առաջընթացն աներևակայելիորեն տպավորիչ է, և, իհարկե, մենք՝ որպես Եվրամիություն, ձգտում ենք լինել Հայաստանի, ինչպես նաև Ադրբեջանի ուժեղ գործընկեր՝ ապահովելու համար, որ այս խաղաղությունը դառնա կայուն իրականություն, որն օգուտ կբերի բոլորին», – նշել է Գրոնոն։

Նրա խոսքով՝ Բրյուսելը տարբեր ձևերով աջակցում է Հայաստանի և Ադրբեջանի միջև խաղաղության գործընթացին։ Տարածաշրջանային կապերի հարցերը նույնպես ԵՄ հիմնական ուշադրության կենտրոնում են։

«Մենք քննարկում ենք Հայաստանի իշխանությունների և, իհարկե, մեր ադրբեջանցի գործընկերների հետ, թե ինչպես լավագույնս աջակցել երթուղիների զարգացմանը, որպեսզի բոլոր երկրները մասնակցեն, որպեսզի երթուղու երկայնքով գտնվող բնակավայրերի բոլոր բնակիչներն օգտվեն դրանից, և, իհարկե, որպեսզի մենք զգալի ներդրում ունենանք ԵՄ-ի համար առաջնահերթ «Միջին միջանցք» նախագծում, որը Հարավային Կովկասի միջոցով Ասիան կապում է Եվրոպայի հետ», – ընդգծել է Գրոնոն։