Ճապոնիայում երկրաշարժի հետևանքով առաջացած տեսանելի վնասները և անտեսանելի վտանգները

Ճապոնիայի հարավում օրերս տեղի ունեցած 7․1 մագնիտուդ ուժգնությամբ երկրաշարժը փոքրիկ Յացուշիրո քաղաքում փլուզել է տներ և ճեղքել փողոցները։ Սակայն քաղաքային իշխանության ներկայացուցիչ Ակիո Մացուշիտայի խոսքով՝ ամենամեծ մտահոգությունը ոչ թե տեսանելի ավերածություններն են, այլ ջրի և էլեկտրաէներգիայի բացակայությունից բխող անտեսանելի վտանգները, որոնք ավելի են խորանում ամառային սաստիկ շոգի պայմաններում․ գրում է Reuters գործակալությունը։

Նավահանգստային քաղաքի շուրջ 58․000 տներից շատերը Կումամոտո պրեֆեկտուրայում տեղի ունեցած երկրաշարժից երկու օր անց դեռևս զրկված են ջրամատակարարումից և էլեկտրաէներգիայից։

Փրկարարական աշխատանքները համակարգող Ակիո Մացուշիտան նշել է, որ առայժմ պարզ չէ՝ վնասված ջրատարների վերականգնումը կտևի օրեր, շաբաթներ, թե նույնիսկ ամիսներ։

Կումամոտո պրեֆեկտուրայի իշխանությունները հայտնել են, որ երկրաշարժի հետևանքով զոհերի թիվը հասել է 17-ի։ Նրանց մեծ մասը զոհվել է Nippon Paper Industries ընկերության թղթի գործարանում, որը լուրջ վնասներ է կրել, ինչպես նաև Aeon առևտրի կենտրոնում, որտեղ, նախնական տվյալներով, տեղի է ունեցել գազի պայթյուն։