ԱՄՆ դպրոցներում կկիրառվեն պղպեղային գազով անօդաչուներ՝ ահաբեկիչներին վնասազերծելու համար

ԱՄՆ 3 նահանգի մի շարք դպրոցներ նոր ուսումնական տարին կսկսեն անվտանգության նոր միջոցառումով՝ պղպեղային գազով և ուժեղ թարթող լույսերով (ստրոբոսկոպային լույսեր) հագեցած անօդաչու սարքերով․ գրում է CBS News-ը։

Արտադրողի խոսքով՝ անօդաչուները կարող են ակտիվ հրաձիգի դեմ օգտագործվել վայրկյանների ընթացքում։

Կոլորադո, Ֆլորիդա և Ջորջիա նահանգների մի շարք դպրոցներ կլինեն առաջինը, որ կներդնեն Mithril Defense ընկերության անօդաչու սարքերը։ Ընկերությունը փորձարկում է այս սարքերի հնարավորությունները՝ պարզելու՝ արդյոք դրանք կարող են իրավապահների հետ համատեղ ավելի արդյունավետ արձագանքել դպրոցներում զինված հարձակումներին։

Mithril ընկերության գործադիր տնօրեն Ջասթին Մարսթոնը հայտարարել է, որ անօդաչուները կարող են դպրոցի միջանցքներով թռչել մինչև 80 կմ/ժ արագությամբ՝ կառավարվելով ընկերության` Տեխաս նահանգի Օսթին քաղաքում գտնվող կենտրոնակայանի օպերատորների կողմից։

Մարսթոնի խոսքով՝ դրոնները նախատեսված են 15 վայրկյանի ընթացքում զինված հարձակվողին հայտնաբերելու և տագնապի ազդանշանների, ուժեղ թարթող լույսերի և պղպեղային գազի միջոցով վնասազերծելու համար։

Learning Policy Institute կազմակերպությունը նշում է, որ ԱՄՆ-ի դպրոցներն այժմ տարեկան շուրջ 4 միլիարդ դոլար են ծախսում իրենց շենքերի անվտանգության ամրապնդման համար՝ տեղադրելով մետաղորսիչներ և տեսահսկման համակարգեր։

K-12 School Shooting Database-ի տվյալներով՝ ԱՄՆ-ի դպրոցներում հրաձգությունների թիվը 2023 թվականին հասել է առավելագույն՝ 352 դեպքի, իսկ վերջին 2 տարում դրանց թիվը նվազել է։ Տվյալների համաձայն՝ 1970-80-ականներին ԱՄՆ դպրոցներում տարեկան, որպես կանոն, գրանցվում էր 30-ից պակաս հրաձգության դեպք։