Գանայում սգում են՝ մահացել է երկրի ամենաբարձրահասակ մարդը

Գանայում սգում են․ 33 տարեկանում մահացել է երկրի ամենաբարձրահասակ մարդը՝ հազվագյուտ գենետիկ հիվանդության հետևանքների դեմ երկարատև պայքարից հետո․ հայտնում է բրիտանական BBC-ն։

Սուլեյմանա Աբդուլ Սամեդը, որն առավել հայտնի է Ավուչե մականունով, մահացել է երկուշաբթի օրը։ Պատճառը ոտքի խոցի վարակն է եղել։

Հարազատները լրագրողներին պատմել են մահացածի անհավանական բարության մասին։ Նրանցից մեկը՝ Սուլեմանա Աբդուլ Կուդուսը, նշել է, որ նույնիսկ իր մահից հետո մարդիկ շարունակում են այցելել տուն՝ պարզելու տեղի ունեցածի հանգամանքները։
Ընտանիքի խոսքով՝ Ավուչեն իսկական հռչակ է բերել իր հեռավոր Գամբագա գյուղին։ Ուր էլ որ նա այցելել է, երբ հիշատակվել է իր հայրենի գյուղը, մարդիկ անմիջապես հիշել են, որ այն երկրի ամենաբարձրահասակ բնակչի ծննդավայրն է։

Տղամարդը տառապում էր Մարֆանի համախտանիշով։ Այս վիճակն ազդում է շարակցական հյուսվածքի վրա՝ առաջացնելով աննորմալ աճ, վերջույթների երկարացում և սրտի լուրջ խնդիրներ։

Նրա իրական հասակը որոշելու պատմությունը երկար ժամանակ վիճելի է եղել։ 2023 թվականին, համապատասխան սարքավորումների բացակայության պատճառով, հիվանդանոցի անձնակազմը նրա հասակը գնահատել է 2.9 մետր, ինչը նրան կդարձներ պատմության մեջ ամենաբարձրահասակ մարդը։ Սակայն, ավելի ուշ գյուղ այցելած լրագրողները չափել են տղամարդու հասակը սովորական չափիչ ժապավենով, և չափումները շատ ավելի համեստ են եղել՝ մոտ 2.2 մետր։ Դատելով լուսանկարներից՝ թվում է, թե լրագրողների չափումները մոտ էին ճշմարտությանը։

Սամեդի խոսքով՝ իր հանկարծակի կտրուկ աճը սկսվել է միայն 20 տարեկանում։

Իր հասակը վերջ է դրել վարորդ դառնալու և ֆուտբոլ խաղալու նրա ծրագրերին։ Բժշկական օգնություն ստանալու դժվարությունը սրել է իրավիճակը, մինչև որ, ըստ լրատվամիջոցների հաղորդագրությունների, Գանայի նախագահ Ջոն Մահամայի եղբայրը չի հոգացել նրա բուժման ծախսերը։