«Ռուսական երկաթուղիներից» արձագանքել են Փաշինյանի հայտարարություններին

«Ռուսական երկաթուղիներ» ԲԲԸ-ից արձագանքել են ՀՀ վարչապետ Նիկոլ Փաշինյանի հայտարարություններին՝ նշելով, որ զարմանքով և տարակուսանքով է ընդունել հայկական երկաթուղիների համար հնարավոր վարձավճարների մասին հնչեցված գնահատականները․ փոխանցում է TACC-ը։

Ընկերության գլխավոր տնօրեն Օլեգ Բելոզյորովի խոսքով՝ ընկերությունը շարունակելու է կատարել Հայաստանի հետ գործող կոնցեսիոն պայմանագրի բոլոր դրույթները։

Բելոզյորովը հավելել է, որ պայմանագրի փոփոխման կամ դադարեցման դեպքում «Ռուսական երկաթուղիներն» իրավունք կունենա ակնկալելու կատարված ներդրումների փոխհատուցում։

Նա նաև նշել է, որ 2008 թվականից ի վեր ընկերության ստացած շահույթն ամբողջությամբ ուղղվել է Հայաստանի երկաթուղային ենթակառուցվածքների զարգացմանը։

Բելոզյորովի գնահատմամբ՝ կոնցեսիոն կառավարումը հնարավորություն է տվել արդիականացնել Հայաստանի երկաթուղային համակարգը՝ առանց պետական բյուջեի վրա լրացուցիչ բեռ ստեղծելու։

Նա ընդգծել է նաև, որ «Հարավկովկասյան երկաթուղին» շարունակում է մնալ երկրի խոշորագույն գործատուներից մեկը, իսկ վերջին տարիներին իրականացվել է նաև ուղևորատար շարժակազմի արդիականացում, այդ թվում՝ 2021 թվականին Հայաստան են մատակարարվել 27 նոր վագոն։